Sep 13

நாட்டின் பாதுகாப்பிற்கு அச்சுறுத்தல் ’ரோஹிங்கிய அகதிகள்’; எச்சரிக்கும் ராஜ்நாத் சிங்!

ரோஹிங்கிய அகதிகள் நாட்டின் பாதுகாப்பிற்கு அச்சுறுத்தலாக விளங்குவதாக மத்திய உள்துறை அமைச்சர் ராஜ்நாத் சிங் தெரிவித்துள்ளார்.

மியான்மரில் ஏற்பட்டுள்ள வன்முறை சம்பவங்கள் காரணமாக, ரோஹிங்கிய முஸ்லீம்கள் அகதிகளாக வெளியேறி வருகின்றனர்.

அவர்கள் பெருமளவில் வங்கதேசத்தில் தஞ்சமடைந்துள்ளனர். இந்நிலையில் இந்தியாவின் பல்வேறு பகுதிகளிலும் ரோஹிங்கிய அகதிகள் வசித்து வருகின்றனர்.

இதுகுறித்து ஜம்முவில் மத்திய உள்துறை அமைச்சர் ராஜ்நாத் சிங்கிடம் எழுப்பப்பட்ட கேள்விக்கு பதிலளித்த அவர், சட்டவிரோத வெளிநாட்டு மக்களின் இடம்பெயர்வு மிகவும் முக்கியமாக கையாளப்பட வேண்டும் என்று கூறினார்.

சட்ட விரோதமாக 6,000 க்கும் மேற்பட்ட ரோஹிங்கிய அகதிகள் வசித்து வருவதாக குறிப்பிட்டார். இதனால் அகதிகள் தொடர்பான மத்திய அரசின் கொள்கையை பரிசீலனை செய்ய வேண்டி இருப்பதாக தெரிவித்தார்.

கடந்த ஆகஸ்ட் மாதம், ரோஹிங்கிய அகதிகள் தீவிரவாத குழுக்களால் பணியமர்த்தப்பட வாய்ப்பிருப்பதாக மத்திய அரசு தெரிவித்தது. இதனால் நாட்டின் பாதுகாப்பிற்கு பெரும் அச்சுறுத்தலாக விளங்கக்கூடும் என்று எச்சரித்தது.

மேலும், ரோஹிங்கிய அகதிகளைக் கண்டறிந்து, உடனடியாக அவர்களை வெளியேற்ற மாநில அரசுகளுக்கு உத்தரவிட்டது. நாட்டில் காணப்படும் குறிப்பிட்ட அளவிலான வளங்கள், இந்தியர்களுக்கே போதுமானதாக இல்லை.

இதனை அகதிகளின் வருகை மேலும் சிரமத்திற்கு ஆளாக்கும் என்று மத்திய உள்துறை அமைச்சகம் குறிப்பிட்டுள்ளது.

கடந்த மாதம் செய்தியாளர்களுக்கு பேட்டியளித்த மத்திய உள்துறை இணையமைச்சர் கிரண் ரிஜிஜு, இந்தியாவில் 40,000 ரோஹிங்கிய அகதிகள் முறைகேடான வகையில் தங்கியிருப்பதாக தெரிவித்தார்.

அவர்கள் ஜம்மு, ஐதராபாத், ஹரியானா, உத்தரப் பிரதேசம், டெல்லி-என்.சி.ஆர் மற்றும் ராஜஸ்தானில் வசித்து வருவதாக கூறினார்.