Sep 08

இந்திய அணி விளையாடியது கிரிக்கெட் இல்லையா?

இந்திய கிரிக்கெட் அணி ரக்பி அணி போல் விளையாடியதாக இலங்கை அணியின் பயிற்சியாளர் நிக் போத்தாஸ் தெரிவித்துள்ளார்.

இலங்கையில் சுற்றுப்பயணம் மேற்கொண்ட இந்திய கிரிக்கெட் அணி டெஸ்ட், ஒருநாள் மற்றும் டி20 என அடுத்தடுத்து 9 போட்டிகளில் வெற்றி பெற்று ஹேட்ரிக் ஒயிட் வாஷ் செய்த சாதனையைப் படைத்தது.

இந்திய அணிக்கு முன் ஜிம்பாவே அணியுடன் நடைபெற்ற ஒருநாள் தொடரை இழந்து நொந்திருந்த அந்த அணி இந்திய அணியிடம் ஒட்டுமொத்தமாக அடிபணிந்ததால் சோகத்தில் மூழ்கியுள்ளது.இந்நிலையில் , இந்திய கிரிக்கெட் அணி புகழ்பெற்ற ரக்பி அணியான ஆல் பிளாக்ஸ் அணி போல விளையாடியது என்று இலங்கை அணியின் பயிற்சியாளர் நிக் போத்தாஸ் தெரிவித்துள்ளார்.

"இந்திய அணியில் உயர்தரமான வீரர்கள் நிறைய பேர் இருக்கிறார்கள். அந்த அணியுடன் மோதுவது எப்போதும் கஷ்டமாகவே இருக்கும். ஒன்று இரண்டு அல்ல, பல விஷயங்களை அவர்கள் மிகச் சிறப்பாகச் செயல்படுத்துகிறார்கள்.

விராட் கோலி ரன்களுக்காக ஒடுவதுப் பாருங்கள். களத்தில் அவர் ஒரு கேப்டனாக சக வீரர்களிடம் மரியாதையைப் பெற்றுள்ளார். முன்னுதாரணமாக விளங்குகிறார். அணியினரை தன் வழியில் சிறப்பாக அழைத்துச் செல்கிறார். அணியில் அவர் உருவாக்கியுள்ள ஒழுங்குமுறை கவர்ச்சிகரமானதாக இருக்கிறது." என்று புகழ்ந்து தள்ளினார் போத்தாஸ்.

மேலும், இந்திய அணியைப் பார்க்கும்போது ஆல் பிளாக்ஸ் ரக்பி அணிபோல இருக்கிறது. எதிரணியின் பலத்திற்கு பெரிய மரியாதை அளிக்கிறார்கள். சமரசமில்லாமல் தங்கள் ஆட்டத்தில் ஈடுபாடு காட்டுகிறார்கள். இப்படி ஒரு அணியாக உருவாவதையே எல்லா பல அணிகள் எல்லாம் கனவு காண்கின்றன. என்றும் அவர் கூறியுள்ளார்.