Jul 22

விமானத்தில் சாட்டிலைட் போன் வசதி விரைவில் அறிமுகம்

விமானத்தில் பறந்துகொண்டிருக்கும் போது மொபைலில் இன்டர்நெட் வசதியை பயன்படுத்தும் வகையில் சாட்டிலைட் போன் வசதி அறிமுகமாக உள்ளது.

விமானத்தில் பயணிக்கும் போது மொபைல் போனில் இன்டர்நெட் வசதி மூலம் பேஸ்புக், ட்விட்டர் உள்ளிட்ட இணையதளங்களைப் பார்க்க சாட்டிலைட் போன் என்ற தொழில்நுட்பம் பயன்படுத்தப்படுகிறது. ஆனால், இந்த வசதி இதுவரை பாதுகாப்புத்துறை அதிகாரிகளுக்கு மட்டுமே வழங்கப்பட்டு வந்தது.

இந்நிலையில், தனியார் நிறுவனங்கள் மற்றும் தனிநபர்களுக்கும் சாட்டிலைட் போன் வசதி மூலம் மொபைல் இன்டர்நெட் வசதியை அளிக்கும் சேவை ஓராண்டுக்குள் கிடைக்கும் என்று பிஎஸ்என்எல் தெரிவித்துள்ளது. இதன் மூலம் விமானத்தில் பயணித்துக்கொண்டிருக்கும் போது வைஃபை ரவுட்டர் மூலம் இன்டர்நெட் வசதியைப் பெற முடியும்.

பிஎஸ்என்எல் மற்றும் சர்வதேச மொபைல் சாட்டிலைட் நிறுவனம் ஆகியவை இணைந்து இச்சேவையை வழங்கும். ஏற்கெனவே மத்திய உள்துறை மற்றும் தகவல் தொழில்நுட்பத்துறை ஆகியவை இதற்கான ஒப்பதலை கொடுத்திருப்பது குறிப்பிடத்தக்கது.