Jun 18

விரைவில் அறிமுகமாகும் பவர்ஃபுல்லான 200 சிசி வெஸ்பா ஸ்கூட்டர்

இத்தாலியை தலைமையிடமாக கொண்டு இயங்கும் பியாஜியோ நிறுவனம், இந்தியாவில் பல பிராண்டுகளின் பெயர்களில் இருசக்கர வாகனங்களை விற்பனை செய்து வருகிறது. நாட்டில் ஸ்கூட்டர்களுக்கான சந்தை அதிகரித்துள்ள நிலையில், புதிய ரக ஸ்கூட்டர்களை விற்பனை செய்ய பியாஜியோ முடிவு செய்துள்ளது.

அதன்படி, 200 சிசி வெஸ்பா ஸ்கூட்டர்கள் இந்தியாவில் களமிறங்கவுள்ளன. இதற்கான ஆயத்தப் பணிகளை பியாஜியோ நிறுவனம் தொடங்கியுள்ளது. ப்ரீமியம் தரத்திலான இந்த ஸ்கூட்டர்கள் 150 சிசி இழுவைத் திறன் முதல் 200 சிசி இழுவைத் திறன் முதல் ஆற்றலை பெற்றிருக்கும் என தெரிகிறது. 

இந்திய அரசின் பிஎஸ் 6 மாசு உமிழ்வு விதிகள் மற்றும் பாதுகாப்பு அம்சங்களை முன்னிறுத்தி இந்த ஸ்கூட்டர்கள் உருவாக்கப்படவுள்ளன. ஃப்யூவல் இன்ஜெக்ஷன் தேர்வில் இதனுடைய எஞ்சின்கள் அமைய பெற்றிருக்கும். புதிய மாடல்களில் எல்இடி ஹெட்லைட்டுகள் கொடுக்கப்பட உள்ளதாகவும் பியாஜியோ தகவல்கள் தெரிவித்துள்ளது. 

பியாஜியோவின் சக்திவாய்ந்த இந்த புதிய ப்ரீமியம் ரக ஸ்கூட்டர்கள் பிஎஸ் 6 எஞ்சினுடன் இந்தாண்டு இறுதியில் வெளியிடப்படும் என அந்நிறுவனம் கூறியுள்ளது. அனைத்துமே வெஸ்பா பிராண்டில் இருக்கும் என்பது இங்கே கவனிக்கத்தக்கது. 

இந்தியா-தைவானை சேர்ந்த 22 கிமோ மோட்டார்ஸ் நிறுவனம், அண்மையில் 300 சிசி மற்றும் 160 சிசி திறன் பெற்ற ஸ்கூட்டர் மாடல்களை விற்பனைக்கு அறிமுகம் செய்தது. இதுவே தற்போது இந்தியாவின் சக்திவாய்ந்த ஸ்கூட்டர் மாடலாக இருந்து வருகிறது. 

அந்த வரிசையில் விரைவில் இடம்பெறும் நோக்கில் வெஸ்பா பிராண்டில் 200 சிசி ஸ்கூட்டர்களை அறிமுகம் செய்ய பியாஜியோ முடிவு செய்துள்ளது. முன்னதாக அப்ரிலியா பிராண்டிலும் பவுர்ஃபுல்லான ஸ்கூட்டர்களை பியாஜியோ அறிமுகம் செய்துள்ளது.