Jul 10

ஆங்கிலேயர்களை துவம்சம் செய்த வேலூர் புரட்சி; முதல் இந்திய சுதந்திரப் போர் தினம் இன்று...!

வேலூர் புரட்சியின் தினம் இன்று அனுசரிக்கப்படுகிறது.

இந்தியாவின் முதல் சுதந்திரப் போராட்டம் என்று வர்ணிக்கப்படும் வேலூர் புரட்சி நிகழ்ந்த நாள் இன்று. வேலூர் கோட்டையில் திப்புசுல்தானின் வாரிசுகளும், உறவினர்களும் சிறை வைக்கப்பட்டிருந்தனர்.

கோட்டையை பாதுகாக்கும் பொறுப்பில், ஆங்கிலேய சிப்பாய்களும், அவர்களுக்கு கட்டுப்பட்ட இந்தியச் சிப்பாய்களும் ஈடுபட்டிருந்தனர். அவர்களில் இந்துக்களும், முஸ்லீம்களும் அடங்குவர்.

இந்நிலையில் சென்னை மாகாண ஆங்கிலேய படைத் தளபதி ஜான் ரடாக், புதிய தோல் தொப்பியை சிப்பாய்களுக்கு அறிமுகப்படுத்தினார். அது மாட்டுத் தோலால் செய்யப்பட்டு, மாட்டுக் கொழுப்பால் பூசப்பட்டது என்று இந்துக்கள் எதிர்த்தனர். மேலும் பன்றி தோலால் செய்யப்பட்டது என்று முஸ்லீம்களும் எதிர்த்தனர்.

அதுமட்டுமல்லாமல், வீரர்கள் நெற்றியில் விபூதி, நாமத்திற்கு தடை, ஒரே மாதிரியான மீசை, மழித்த தாடி என்று விதிமுறைகள் உருவாக்கப்பட்டன. இதன்மூலம் தாங்கள் கிறிஸ்துவாக மாற்றப்படுவதாக வீரர்கள் எண்ணினர்.

இந்த சூழலில் 1806ஆம் ஆண்டு, ஜூலை 10ஆம் தேதி இரவு வேலூர் கோட்டையில் புரட்சி வெடித்தது. இந்திய வீரர்கள் ஒன்றுகூடி, ஆங்கிலேய அதிகாரிகளை சுட்டுக் கொன்றனர். பின்னர் கோட்டையை புரட்சியாளர்கள் கைப்பற்றினர்.

திப்பு சுல்தானின் புலிக் கொடியை ஏற்ற தயாராக இருந்தனர். பொழுது விடிந்த சில மணி நேரங்களில் பல்வேறு ஊர்களில் இருந்து ஆங்கிலேயப் படைகள் வந்து, கோட்டையை மீண்டும் கைப்பற்றினர். அதில் புரட்சியாளர்கள் சுட்டுக் கொல்லப்பட்டனர். ஏராளமானோர் கைது செய்யப்பட்டனர்.

இந்த புரட்சி நிகழ்ந்து, சுமார் 50 ஆண்டுகளுக்கு பிறகு, வட இந்தியாவில் ஆங்கிலேயர்களுக்கு எதிராக புரட்சி வெடித்தது.