Jun 29

மகளிர் உலகக் கோப்பை கிரிக்கெட்: டாஸ் வென்ற இந்திய அணி பீல்டிங்

மகளிர் உலகக் கோப்பை கிரிக்கெட் தொடரில் வெஸ்ட் இண்டீஸ் அணிக்கு எதிரான இரண்டாவது லீக் போட்டியில் இந்திய அணி அணி டாஸ் வென்று பீல்டிங் செய்வதாக அறிவித்துள்ளது.

மகளிர் உலகக் கோப்பை கிரிக்கெட் தொடர் இங்கிலாந்து நாட்டில் நடைபெற்று வருகிறது. இத்தொடரில் இந்திய மகளிர் அணி தனது முதல் லீக் போட்டியில் இங்கிலாந்து அணியை 35 ரன்கள் வித்தியாசத்தில் வீழ்த்தியது.இரண்டாவது லீக் போட்டியில் இந்திய அணி இன்று வெஸ்ட் இண்டீஸ் அணியை எதிர்த்து விளையாட உள்ளது. இப்போட்டியில் இந்திய அணி டாஸ் வென்று பந்துவீச்சை தேர்வு செய்திருக்கிறது.

முதல் போட்டியில் அபாரமாக விளையாடிய இந்திய அணியின் பேட்டிங்கில் தொடக்க வீராங்கனைகள் பூனம் ராவுத் மற்றும் ஸ்ம்ரிதி மந்தனா ஆகியோர் சிறப்பான தொடக்கம் கொடுத்தனர்.

பின்னர், கேப்டன் மிதாலி ராஜ் வழக்கம் போல அரைசதத்தை கடந்து சாதனை படைத்தார். முதல் முன்று வீராங்கனைகள் பீட்டிங்கில் எதிரணிக்கு பெரும் சவாலாக இருப்பதால் பேட்டிங் பற்றி இந்திய அணிக்கு கவலை இல்லை. பந்துவீச்சிலும் ஜுலான் கோஸ்வாமி, ஷிகா பாண்டே, தீப்தி சர்மா ஆகியோர் அசத்துகின்றனர்.

வெஸ்ட் இண்டீஸ் அணி தனது முதல் லீக் போட்டியில் ஆஸ்திரேலிய அணியுடன் தோல்வியுற்றிருக்கிறது. இதனால், இப்போட்டியில் வெல்ல முனைப்பு காட்டும்.

மேலும், இன்றைய போட்டி அந்த அணியின் கேப்டன் ஸ்டெஃபானீ டெய்லருக்கு 100வது ஒருநாள் போட்டி ஆகும். இப்போட்டியில் வெற்றி பெற்று முத்திரை பதிக்க அவர் சிறப்பாக திட்டம் வகுப்பார். அதனை முறியடித்து இந்திய அணி வெற்றி பெற இந்திய அணி முழுத்திறனையும் வெளிப்படுத்தும் என்று எதிர்பார்க்கலாம்.