Jun 25

ஏ.டி.பி., சாலஞ்சர் டென்னிஸ்: பட்டம் வென்றது பயஸ் ஜோடி!

ஏ.டி.பி., சாலஞ்சர் டென்னிஸ் தொடரின் இரட்டையர் பிரவில் லியாண்டர் பயஸ் – அடில் ஷமாஸ்தின் ஜோடி கோப்பையைக் கைப்பற்றியது.

இங்கிலாந்தின் இல்க்லே நகரில் நடைபெறும் ஆடவருக்கான ஏ.டி.பி., சாலஞ்சர் டென்னிஸ் தொடரில் சனிக்கிழமை நடைபெற்ற இரட்டையர் பிரிவு இறுதி ஆட்டத்தில், இந்தியாவின் லியாண்டர் பயஸ் மற்றும் கனடாவின் அடில் ஷமாஸ்தின் இணை, இங்கிலாந்தின் பிரைய்டன் மற்றும் ஷாலிஸ்பேரி இணையை எதிர்த்து விளையாடியது.

பயஸ் –ஷமாஸ்தின் இணை முதல் செட்டை 2–6 என இழந்தது. ஆனால், அடுத்த செட்டை 6–2 என வசமாக்கியது. தொடர்ந்து சிறப்பாக விளையாடிய இந்த இணை கடைசி செட்டிலும் 10–8 என வெற்றிபெற்று கோப்பையைக் கைப்பற்றியது.

ஒரு மணி நேரம் 6 நிமிடம் நீடித்த இப்போட்டியின் முடிவில், பயஸ் - ஷமாஸ்தின் இணை 2–6, 6–2, 10–8 என்ற செட் கணக்கில் பிரைய்டன் – ஷாலிஸ்பேரி இணையை வீழ்த்தி சாம்பியன் பட்டம் வென்றுது.நடப்பு ஆண்டின் சாலஞ்சர் டென்னிஸ் தொடர்களில் பயஸ் இணை பெற்றுள்ள மூன்றாவது சாம்பியன் பட்டம் இதுவாகும். இவற்றில் இரண்டு முறை ஷமாஸ்தின் உடன் இணைந்து பட்டம் பெற்றிருக்கிறார். ஒரு முறை அமெரிக்காவின் ஸ்கார்ட் லிப்ஸ்கி உடன் விளையாடி சாதித்திருக்கிறார்.