Jun 24

4ஜி டேட்டா கார்டு சேவையில் ஹூவெய் நிறுவனத்தை பின்தள்ளி ஜியோ சாதனை

4ஜி டேட்டா கார்டு சேவை வழங்கும் சிறப்பான நிறுவனம் என்ற பெருமையை ரிலையன்ஸ் ஜியோ பெற்றுள்ளது.

முகேஷ் அம்பானிக்குச் சொந்தமான ரிலையன்ஸ் ஜியோ நிறுவனம், பெரும் எதிர்பார்ப்புக்கு இடையே, கடந்த ஆண்டில் 4ஜி சேவையை தொடங்கியது.

பல்வேறு கவர்ச்சி சலுகை அறிவிப்புகள் மூலமாக, இந்திய அளவில் ஏராளமான வாடிக்கையாளர்களை ஈர்த்த ஜியோ, தொலைத்தொடர்புச் சேவையில் முன்னணி நிறுவனங்களில் ஒன்றாக உருவெடுத்தது.அந்நிறுவனத்தின் வாடிக்கையாளர் எண்ணிக்கை 10 கோடியை கடந்து, மேன்மேலும் அதிகரித்தபடியே உள்ளது. குறிப்பாக, 4ஜி சேவையில் ஜியோவின் பங்களிப்பு இந்திய அளவில் பெரும் கவனத்தை ஈர்த்துள்ளது.

இந்நிலையில், 4ஜி டேட்டா கார்டு சேவையில், ஜியோ முதலிடத்தைப் பெற்றுள்ளதாக, தெரியவந்துள்ளது. இதுநாள் வரையிலும், டேட்டா கார்டு சேவையில், ஹூவெய் நிறுவனம் முன்னிலையில் இருந்துவந்தது. சர்வதேச அளவில், ஹூவெய் நிறுவனமே டேட்டா கார்டு விநியோகத்தில் முன்னிலை வகித்து வருகிறது.

ஆனால், அதற்கு சவால் விடும் வகையில், இந்திய சந்தையில் மட்டுமே கடந்த 6 மாதங்களில், 36 லட்சம் டேட்டா கார்டுகளை ஜியோ நிறுவனம் விநியோகித்துள்ளது. இது முக்கிய சாதனையாகக் கருதப்படுகிறது. வரும் நாட்களில், இது மேலும் பலமடங்காக அதிகரிக்கும் என்றும் ஜியோ எதிர்பார்ப்பு தெரிவித்துள்ளது.