Jun 24

ஆட்டம் போட்ட அடைமழை: அம்பேல் ஆனது முதல் ஒருநாள் போட்டி!

இந்தியா வெஸ்ட் இண்டீஸ் அணிகளுக்கு இடையேயான முதல் ஒருநாள் போட்டி மழை காரணமாக கைவிடப்பட்டது.

சாம்பியன்ஸ் கோப்பை தொடர் முடிந்ததும் லண்டனில் இருந்து நேரடியாக வெஸ்ட் இண்டீஸ் சென்ற இந்திய அணி அந்நாட்டு அணியுடன் முதலில் 5 ஒருநாள் போட்டிகளிலும் பின் ஒரு டி20 போட்டியிலும் விளையாடுகிறது.

இந்தியா அணியின் இச்சுற்றுப்பயணத்தில் முதல் ஒருநாள் ஆட்டம் இன்று போர்ட் ஆப் ஸ்பெயினில் உள்ள குயின்ஸ் பார்க் ஓவல் மைதானத்தில் நடைபெற்றது. இதில் டாஸ் வென்ற வெஸ்ட் இண்டீஸ் அணி முதலில் இந்திய அணியை பேட்டிங் செய்ய வைத்தது.

இந்திய அணியின் தொடக்க வீரர்களாக களமிறங்கிய ரஹானே, தவான் ஆகியோர் சிறப்பாக ஆடி அரைசதங்கள் விளாசினர். 62 ரன்கள் எடுத்த நிலையில் ரஹானே வெளியேறினார். தொடர்ந்து சிறிது நேரத்திலேயே தவானும் 87 ரன்களில் அவுட்டாகி சதத்தை தவறவிட்டார்.யுவராஜ் சிங் 4 ரன்கள் எடுத்து நடையைக் கட்டினார்.

பின்னர், கேப்டன் கோலியுன் முன்னாள் கேப்டன் தோனி இணைந்தார். 38 ஓவர்கள் வீசப்பட்ட நிலையில் மழை வந்ததால் ஆட்டம் தற்காலிகமாக நிறுத்தப்பட்டது.

நீண்ட இடைவேளைக்குப் பிறகு மழை நின்று, ஆட்டம் மீண்டும் தொடங்கியது. ஆனால், 39.3 ஓவர்கள் வீசப்பட்ட நிலையில் மீண்டும் பலத்த மழை தொடங்கியது. இதனால், ஆட்டம் தொடர்வதில் சிக்கல் உண்டானது.குயின்ஸ் பார்க் ஓவல் மைதானத்தில் மழைநீர் உறிஞ்சுவதற்கான வசதிகளும் அதிகம் இல்லாத நிலையில், மழையால் ஆட்டம் கைவிடப்படுவதாக அறிவிக்கப்பட்டது.

ஆவேசமுடன் கொட்டித்தீர்த்த மழை தொடரின் முதல் ஆட்டத்தை அம்பேல் ஆக்கியவிட்டதால் கிரிக்கெட் ரசிகர்கள் ஏமாற்றம் அடைந்துள்ளனர்.