Jun 21

மொய் வைப்பதற்கு “இமொய்” எனும் அப்ளிகேஷனை கண்டுபிடித்துள்ள உசிலம்பட்டி பெண்கள்!

மதுரை உசிலம்பட்டியை சேர்ந்த குடும்ப தலைவிகள் இணைந்து இமொய் (eMoy) எனும் அப்ளிகேஷனை கண்டுபிடித்துள்ளனர்.

விசேஷங்களுக்கு மொய் செய்வது என்பது தமிழர்களின் பாரம்பரியம் மற்றும் கலாச்சாரத்துடன் ஒன்றியது. மற்றவர்கள் தங்களுக்கு செய்தது, நாம் பிறருக்கு செய்தது என்று நோட்டுகளில் எழுதி வைக்கும் வழக்கம் உண்டு. இதனை சுலபமாக்க மதுரை உசிலம்பட்டியை சேர்ந்த பெண்கள் புதிய அப்ளிகேஷன் மற்றும் சாப்ட்வேரை கண்டுபிடித்துள்ளனர்.

எம்சிஏ பட்டதாரிகளான செல்வ அமுதா, ஈஸ்வரி, விஜிதா, ரேவதி, சுபா மற்றும் ஜெல்சி ஆகியோர் சேர்ந்து இந்த அப்ளிகேஷனை உருவாக்கியுள்ளனர்.மொய் எழுதி அவற்றை மின்னணு முறையில் பாதுகாப்பதற்காக இந்த eMoy ஆப் பயன்படுத்தப்படுகிறது. 5 மனிதர்கள் 5 மணிநேரம் எடுத்து செய்யும் வேலையை இந்த ஆப் ஒரு மணிநேரத்தில் செய்துவிடுகிறது. மேலும் மொய் எழுதும் வேலையை, மிகவும் சுலபமாக, துல்லியமாக இந்த ஆப் செய்கிறது. மொய் வைத்தபின் எவ்வளவு மொய் வைத்தோம் என்ற எஸ்எம்எஸ்ஸூம், ரசீதும் வழங்கப்படுகிறது.

இமொய் ஆப் பயன்படுத்தினால் யாரிடம் வேண்டுமானாலும் பணம் கொடுத்து மொய் செய்ய சொல்லலாம். ஏனென்றால் மொய் செய்தவுடன் எஸ்எம்எஸ் உங்கள் தொலைபேசி எண்ணுக்கு குறுஞ்செய்தி வந்துவிடும். விசேஷம் முந்த பின்னர் ரூபாயை மணிக்கணக்கில் சரிபார்க்க தேவையில்லை. மிகத்துல்லியமாக எவ்வளவு மொய் வந்துள்ளது என்பதை ரூபாய் நோட்டு எண்ணிக்கையுடன் ஆப் சொல்லிவிடுகிறது.

பணம் மட்டுமல்லாமல் வேறு என்ன பொருள் வாங்கிக்கொடுத்தார்கள் என்றும் பதிவேற்றி கொள்ளலாம். இதுவரை நீங்க செய்த மொய், உங்களுக்கு மற்றவர்கள் செய்த மொய் எல்லாவற்றையும் பதிவேற்றிக்கொள்ள eMoy சாப்ட்வேர் உள்ளது. அதில் பதிவேற்றிவிட்டால் நோட்டுகளை புரட்ட தேவையில்லை. எளிதாக உங்கள் மொபைலில் கணக்கு பார்த்து கொள்ளலாம். இது பற்றிய கூடுதல் தகவல்களுக்கு http://emoy.in/# என்ற இணையதளத்தை பார்த்து தெரிந்து கொள்ளலாம்.