Nov 12

ஒரு வழியாக திரைக்கு வரும் ஜோதிகாவின் காற்றின் மொழி!

மாஸ் ஹீரோக்களின் படங்களுக்கு வழிவிட்ட ஜோதிகாவின் காற்றின் மொழி வரும் 16ம் தேதி உலகம் முழுவதும் வெளியாகவுள்ளது. 

ஜோதிகா தற்போது நடித்து முடித்துள்ள படம் ‘காற்றின் மொழி’. இந்தப் படத்தை ‘மொழி’ படத்தை இயக்கிய ராதாமோகன் இயக்கியுள்ளார். இந்தப் படத்தில் ஜோதிகா சோலோ ஹீரோயினியாக நடித்துள்ளார். 

நீண்ட நாட்களுக்கு பிறகு நடிகை ஜோதிகா, ‘36 வயதினிலே’, ‘மகளிர் மட்டும்’ என்ற படங்களின் மூலமாக குடும்ப பார்வையாளர்களை ஈர்த்தவர். இவர் நடிப்பில் தற்போது ‘காற்றின் மொழி’ என்ற படம் வெளியாகவிருக்கிறது. சில நாட்களுக்கு முன்பு வெளிவந்த இந்த படத்தின் பர்ஸ்ட் லுக் போஸ்டர் மற்றும் அதன் ட்ரைலர் ரசிகர்களை வெகுவாக ஈர்த்தது. இந்தப் படத்தில் ஜோதிகாவின் கணவராக நடிகர் வித்தார்த் நடித்துள்ளார். மேலும் இந்தப் படத்தில் நடிகர் சிம்பு சிறப்பு தோற்றத்தில் நடித்துள்ளதாக கூறப்படுகிறது. இந்நிலையில் தற்போது சிம்புவை தொடர்ந்து காமெடி நடிகரான யோகி பாபுவும் நடித்துள்ளார் . 

காற்றின் மொழி படமானது ஜோதிகாவின் பிறந்தநாளான அக்டோபர் 18ம் தேதி வெளியிடுவதாக இருந்தது. ஆனால், அப்போது வடசென்னை, சண்டக்கோழி 2 ஆகிய படங்கள் திரைக்கு வந்ததால், படத்தின் ரிலீஸ் தேதி தள்ளிவைக்கப்பட்டது.

இந்நிலையில், காற்றின் மொழி திரைப்படம் வரும் 16ம் தேதி திரைக்கு வரும் என்று அதிகாரப்பூர்வமாக அறிவிக்கப்பட்டுள்ளது. இதனிடையே கருணா என்பவர் தனது டுவிட்டர் பக்கத்தில் காற்றின் மொழி படம் குறித்து பதிவிட்டிருந்தார்.

அதில், ‘காற்றின் மொழி தீபாவளிக்கே கூட வந்திருக்கலாம்! 6 ஸ்கிரீனுக்கு ஒன்று கிடைச்சிருந்தால் கூட நல்ல பப்ளிசிட்டி கிடைச்சிருக்கும். எனிவே, உங்களுக்குத் தெரியாத பிசினெஸ் மாடலா? காற்றின் மொழிக்கு அட்வான்ஸ் வாழ்த்துகள்’ என்று குறிப்பிட்டிருந்தார் என்பது குறிப்பிடத்தக்கது.