Nov 03

தோனியால் தான் பண்ட், கார்த்திக்கிற்கு அணியில் வாய்ப்பு: ரோஹித் சர்மா

தோனி அணியிலிருந்து நீக்கப்பட்டுள்ளது, டி20 தொடர்களில் ரிஷாப் பண்ட் மற்றும் தினேஷ் கார்த்திக்கிற்கு வாய்ப்பு வழங்கியுள்ளதாக இந்திய அணியின் கேப்டன் ரோஹித் சர்மா தெரிவித்துள்ளார். 

கடந்த சில தினங்களுக்கு முன், பிசிசிஐ மேற்கிந்தியத் தீவுகள் அணிக்கு எதிரான டி20 தொடரிலும், அடுத்த மாதம் நடைபெறும் ஆஸ்திரேலிய அணிக்கு எதிரான டி20 தொடரிலும் விளையாட உள்ள இந்திய அணியை அறிவித்தது. 

இதில், இந்திய அணியின் நட்சத்திர வீரர் தோனி அணியிலிருந்து நீக்கப்பட்டது, அனைவரையும் அதிர்ச்சிக்கு உள்ளாக்கியது. அவருக்குப் பதிலாக ரிஷாப் பண்ட் மற்றும் தினேஷ் கார்த்திக் ஆகியோர் அணியில் சேர்க்கப்பட்டனர். 

இந்நிலையில், செய்தியாளர் சந்திப்பில் பேசிய இந்தியாவின் தற்காலிக கேப்டன் ரோஹித் சர்மா, “தோனி எங்களுக்கு மிக பெரிய வீரராக இருந்து வருகிறார். மிடில் ஆர்டரில் அவரது அனுபவத்தை நாங்கள் இழந்தாலும், ரிஷாப் பண்ட் மற்றும் கார்த்திக் போன்றவர்கள் தங்கள் திறமையை வெளிப்படுத்த, இதன்மூலம் ஒரு வாய்ப்பு வழங்கப்பட்டுள்ளது. உலகக்கோப்பையில் விளையாடும்போது குறைவான வீரர்களை வைத்திருக்கக் கூடாது, நிறைய வீரர்கள் இருக்க வேண்டும். அப்போதுதான், ஒருவர் இல்லையென்றால், மற்ற வீரரை அவருக்குப் பதிலாக பயன்படுத்தலாம்,” எனத் தெரிவித்தார்.

தொடர்ந்து கேப்டன்ஷிப் பொறுப்பு வழங்கப்பட்டது குறித்து பேசிய ரோஹித் சர்மா, “இது ஒட்டுமொத்தமாக எனக்கு உதவியுள்ளது. ஒவ்வொரு முறை கேப்டன் வாய்ப்பு வழங்கப்பட்டபோதும், அதை நான் சந்தோசமாகவே எடுத்துக்கொண்டேன். அது எனக்கு ஒரு பொறுப்புணர்வை அளிக்கிறது,” என ரோஹித் சர்மா தெரிவித்துள்ளார்.