Jun 18

“ஹாக்கி என்றாலே எனக்கு பயம்” : கேப்டன் விராட் கோலி!

இதுவரை ஹாக்கி விளையாடியதில்லை என்றும் காரணம் அடிபட்டுவிடுமோ என்ற பயம் தான் என்றும் இந்திய கிரிக்கெட் அணியின் கேப்டன் விராட் கோலி கூறியிருக்கிறார்.

இந்தியாவின் கிரிக்கெட் அணி மற்றும் ஹாக்கி அணி இரண்டும் லண்டனில் உள்ளது. இரண்டு அணிகளும் பாகிஸ்தான் உடன் மோத உள்ளன. வரலாற்றில் முதல் முறையாக இந்தியா – பாகிஸ்தான் அணிகள் ஒரே நகரில் இரண்டு போட்டிகளில் மோதுகின்றன. விராட் கோலி தலைமையில் சாம்பியன் டிராபி இறுதிப்போட்டியும், மன்பிரீத் சிங் தலைமையில் உலக ஹாக்கி செமி பைனல் போட்டியும் நடக்க உள்ளது.

இந்நிலையில் இந்திய கிரிக்கெட் அணியின் கேப்டன் விராட் கோலி இந்திய ஹாக்கி அணிக்கு வாழ்த்து தெரிவித்துள்ளார். மேலும் ஹாக்கி விளையாடுவது தனக்கு பயம் என்றும் விராட் கோலி கூறியிருக்கிறார். சிந்தடிக் ஹாக்கி பந்துகளை வைத்து இண்டோரில் விளையாடி உள்ளதாகவும், ஆனால் ஹாக்கி விளையாடியது இல்லை என்று கோலி கூறியுள்ளார்.

மேலும் ஹாக்கி விளையாட்டு தனக்கு பயத்தை கொடுக்கும் என்றும், ஏனென்றால் பெனால்டி கார்னரின் போது முகத்தில் அடிபட்டுவிடுமோ என்று பயப்படுவேன், ஆனால் ஹாக்கி வீரர்கள் தைரியமாக விளையாடுகின்றனர் என்று புகழாரம் சூட்டியுள்ளார்.