Jun 14

மகிளா கோர்ட் வேண்டும்: மத்திய அமைச்சரிடம் வரலட்சுமி கோரிக்கை

மாவட்டந்தோறும் மகிளா நீதிமன்றம் அமைப்பட வேண்டும் மத்திய அமைச்சரிடம் என்று நடிகை வரலட்சுமி கோரிக்கை மனு அளித்துள்ளார்.

தமிழ், கன்னடம், மலையாளம் ஆகிய மொழிகளில் ஒரு சில படங்களில் மட்டும் நடித்துள்ளார் நடிகை வரலட்சுமி. சினிமா வாய்ப்பு குறைவாக இருக்கும் இந்த நேரத்தில் சமூக அக்கறைப் பற்றியும் கவலைப்பட்டு வருகிறார். இந்நிலையில், பாலியல் தொல்லைகளுக்கு உள்ளாகும் நடிகைகள் உள்பட பல பெண்களை பாதுகாக்கும் வகையில் சேவ் சக்தி என்ற அமைப்பை வரலட்சுமி தொடங்கியுள்ளார்.இது சார்பில் கையெழுத்து பிரசார இயக்கத்தையும் சென்னையில் தொடங்கினார். இதன் தொடர்ச்சியாக தமிழக முதல்வர் எடப்பாடி பழனிசாமியை சந்தித்து பேசியுள்ளார்.

அப்போது, மகளிர் நீதிமன்றங்கள், பெண்களுக்கு எதிரான குற்ற வழக்குகளை 6 மாதத்திற்குள் முடிக்க நடவடிக்கை எடுக்க வேண்டும் என்பன உள்ளிட்ட பல கோரிக்கைகள் அடங்கிய மனு ஒன்றை அளித்துள்ளார். இதனைத் தொடர்ந்து டெல்லி சென்ற அவர் அங்கு மத்திய சட்டத்துறை இணையமைச்சர் பி.பி.சௌத்ரியை அவரது அலுவகலத்தில் நேற்று சந்தித்து மனு ஒன்றை அளித்துள்ளார்.

அதில் கூறியிருப்பதாவது: தமிழகத்தில் மாவட்டந்தோறும் மகளிர் நீதிமன்றம் அமைக்க நடவடிக்கை எடுக்க வேண்டும். அப்போது தான் பெண்கள் தொடர்பான வழக்குகள் விரைவில் நடத்தி முடிக்கப்படும் என்று குறிப்பிடப்பட்டுள்ளது.

பின்னர் செய்தியார்களைச் சந்தித்த அவர் கூறுகையில், தமிழகம் முழுவதும் மகளிர் நீதிமன்றங்களின் எண்ணிக்கையை அதிகரிக்க வேண்டும் என்று மத்திய இணையமைச்சரை கேட்டுக்கொண்டேன்.

இதனை ஏற்றுக்கொண்ட அவர் அனைத்து மாநிலங்களுக்கும் கடிதம் எழுதுவதாக குறிப்பிட்டுள்ளார். தமிழகத்தில் தற்போது 5 முதல் 6 மகளிர் நீதிமன்றங்கள் உள்ளன. மாவட்டந்தோறும் ஒரு மகளிர் நீதிமன்றம் அமைக்கப்பட வேண்டும் என்பதே எங்களது கோரிக்கை என்று கூறியுள்ளார்.