Sep 24

பார்வதியின் அவதாரம்; சோழப் பேரரசின் ராஜமாதா; மெய்சிலிர்க்க வைக்கும் செம்பியன் மாதேவி!

தஞ்சை மாவட்டம் திருவிடைமருதூரில் இருந்து 10 கிமீ தொலைவில் கொன்னேரி ராசபுரம் அமைந்துள்ளது. அங்குள்ள உமா மகேஷ்வரர் கோவிலில் கண்டராதித்த சோழன் மற்றும் அவரது மனைவி செம்பியன் மாதேவி ஆகியோரின் சிலைகள் இருந்தன. கடந்த 40 ஆண்டுகளுக்கு முன்பாக செம்பியன் மாதேவி சிலை மாயமானது. இந்நிலையில் மாயமான சிலை அமெரிக்காவின் வாஷிங்டன் டிசியின் ஒரு அருங்காட்சியகத்தில் இருப்பது தெரியவந்துள்ளது. 

இதுதொடர்பான ஆதாரங்களுடன் நாகப்பட்டினம் காவல்துறை ஆய்வாளரிடம் வழக்கறிஞர் யானை ராஜேந்திரன் புகார் அளித்துள்ளார். இந்த வழக்கு சிலை கடத்தல் தடுப்பு பிரிவு அதிகாரியான ஐஜி பொன்மாணிக்கவேல் குழுவுக்கு மாற்றம் செய்யப்பட்டுள்ளது. இனி செம்பியன் மாதேவியின் சிறப்பு குறித்து காணலாம். 

சோழப் பேரரசின் ராஜமாதா என்றே செம்பியன் மாதேவி கருதப்பட்டு வந்தார். இவர் சோழப் பேரரசர் கண்டராதித்தனின் மனைவி ஆவார். செம்பியன் மாதேவி வீரம், அறம், கொடை, சிவபக்தி, அரசாளும் கொள்கை ஆகியவற்றில் புகழ்பெற்று விளங்கினார். இவர்களுக்கு உத்தமச் சோழர் என்னும் மதுராந்தகச் சோழர் என்ற மகன் பிறந்தார். 

தனது கணவர் மறைவிற்கு பின், மகனை அரியணை ஏற்றி விட்டு செம்பியன் மாதேவி துறவு பூண்டு, சிவபக்தை ஆனார். சிவபெருமான் மீது கொண்ட அளவற்ற பக்தியால், சோழ நிலப்பரப்பில் ஏராளமான சிவாலயங்களை நிறுவினார். இதற்காக சிற்பிகளை தேடித் தேடி அழைத்து வந்தார்.

இவர் நிறுவிய 10 சிவாலயங்கள் வரலாற்று முக்கியத்துவம் வாய்ந்தது. அதில் ஒன்று கும்பகோணம் கண்டராதித்திய புரத்தில் உள்ள சிவாலயம் ஆகும். உலகிலேயே முதல் ஐம்பொன் நடராஜர் சிலையை நிறுவியவர் என்ற பெருமைக்கு உரியவர் செம்பியன் மாதேவி. 

மதுராந்தகச் சோழனின் மகன் ராஜராஜச் சோழன் தனது பாட்டியார் செம்பியன் மாதேவியை பார்வதியின் அவதாரம் என்றே கருதி வழிபட்டு வந்தார். முதலாம் ராஜேந்திர சோழன் காலத்தில் செம்பியன் மாதேவிக்கு, கொன்னேரி ராசபுரம் உமா மகேஷ்வரர் கோவிலில் ஐம்பொன் சிலை வடிக்கப்பட்டது.