Jun 11

ஆப்ரிக்கா ஆசைக்கு ஆப்பு அடித்த இந்திய அணி: அரையிறுதிக்கு அலப்பரையாக தகுதி!

தென் ஆப்ரிக்க அணிக்கு எதிரான சாம்பியன்ஸ் டிராபி கிரிக்கெட் தொடரில் 8 விக்கெட் வித்தியாசத்தில் வெற்றி பெற்று அரையிறுதிக்குள் அலப்பரையாக நுழைந்தது.

இங்கிலாந்தில் மினி உலகக்கோப்பை என கருதப்படும், சாம்பியன்ஸ் டிராபி கிரிக்கெட் தொடர் நடக்கிறது. இதில் இங்கிலாந்து, ஆஸ்திரேலியா, இந்தியா, தென் ஆப்ரிக்கா, நியூசிலாந்து, இலங்கை, பாகிஸ்தான், வங்கதேசம் உள்ளிட்ட 8 அணிகள் பங்கேற்கின்றன.லண்டனில் நடந்த மிக முக்கியமான 11வது லீக் போட்டியில் இந்திய அணி, தென் ஆப்ரிக்க அணியை எதிர்கொண்டது. இதில் வெற்றி பெறும் அணி அரையிறுதிக்கு செல்லும், தோல்வியடையும் அணி வீட்டுக்கு கிளம்பும் என்ற நிலையில் இரு அணிகளும் களமிறங்கின.

இதில் ‘டாஸ்’ வென்ற இந்திய கேப்டன் விராட் கோலி, முதலில் ‘பீல்டிங்’ தேர்வு செய்தார். இதையடுத்து களமிறங்கிய தென் ஆப்ரிக்க அணியின் நட்சத்திர வீரர்கள் அனைவரும் ஜொலிக்க தவற, அந்த அணி 44.3 ஓவரில் 191 ரன்களுக்கு ஆல் அவுட்டானது.

சுலப இலக்கை துரத்திய இந்திய அணிக்கு வழக்கம் போல, ரோகித், தவான் ஜோடி துவக்கம் அளித்தது. ரோகித் (12) அவசரப்பட்டு அவுட்டானார். தவான் (78) அரைசதம் கடந்து அசத்தினார். பின் கேப்டன் கோலியுடன் ஜோடி சேர்ந்த யுவராஜ் கடைசி வரை கைகொடுக்க, இந்திய அணி, 38 ஓவரில் 2 விக்கெட்டுக்கு 193 ரன்கள் எடுத்து வெற்றி பெற்று அரையிறுதிக்குள் நுழைந்தது.அரையிறுதியில், ‘ஏ’ பிரிவில் இரண்டாவது இடம் பிடித்த வங்கதேச அணியை இந்திய அணி எதிர்கொள்ளவுள்ளது.