Jun 11

அரையிறுதியில் புகுந்த வங்கப்புலி; மழையால் காலியான ஆஸ்திரேலியா...!

இங்கிலாந்து - ஆஸ்திரேலியா அணிகள் மோதிய ஆட்டத்தில் டக்வொர்த் லீவிஸ் முறைப்படி, இங்கிலாந்து அணி வெற்றி பெற்றது.

மினி உலகக் கோப்பை எனப்படும் சாம்பியன்ஸ் கோப்பை கிரிக்கெட் போட்டிகள் இங்கிலாந்தில் நடைபெற்று வருகிறது. அதில் 10வது லீக் போட்டியில் இங்கிலாந்து - ஆஸ்திரேலியா அணிகள் இன்று மோதின. இங்கிலாந்து அணி 2 போட்டிகளில் வெற்றி பெற்று, அரையிறுதிப் போட்டிக்கு தகுதி பெற்றது. ஆனால் ஆஸ்திரேலியாவிற்கு வாழ்வா? சாவா? ஆட்டமாகும்.

டாஸ் வென்ற இங்கிலாந்து அணி ஃபீல்டிங்கை தேர்வு செய்தது. 50 ஓவர்கள் முடிவில் ஆஸ்திரேலிய அணி 9 விக்கெட் இழப்பிற்கு 277 ரன்கள் எடுத்தது. இதைத் தொடர்ந்து ஆடிய இங்கிலாந்து அணி 40.2 ஓவர்களில் 240 ரன்கள் எடுத்திருந்தது. அப்போது மழையால் ஆட்டம் தடைபட்டது. இந்நிலையில் டக்வொர்த் லீவிஸ் முறைப்படி, இங்கிலாந்து 40 ரன்கள் வித்யாசத்தில் வெற்றி பெற்றதாக அறிவிக்கப்பட்டது.

அதன்மூலம் ஆஸ்திரேலிய அணி தொடரில் இருந்து வெளியேறியது. சதமடித்த ஸ்டோக்ஸ் ஆட்ட நாயகன் விருதைப் பெற்றார். இதைத் தொடர்ந்து புள்ளிப்பட்டியலில் 3 புள்ளிகளுடன் 2வது இடம்பிடித்த வங்கதேசம் அரையிறுதிக்கு முன்னேறியது.