Sep 11

விநாயகர் சதுர்த்தி நாளில் நிலாவை பார்க்கக் கூடாது என்று சொல்வது ஏன்?

விநாயகர் சதுர்த்தி அன்று வானில் நிலாவைப் பார்க்கக் கூடாது என்று சொல்வதற்குக் காரணம் என்ன? 

உணவுகள் மீது விநாயகருக்கு மிகவும் பிரியம். அவரது பக்தர்கள் அன்போடு கொடுக்கும் உணவு வகைகளை எல்லாம் ஒன்று விடாமல் சாப்பிட்டுவிடுவார். ஒருநாள் அவரது பக்தர் ஒருவர் விநாயகருக்கு தனது வீட்டில் விதவிதமான பதார்த்தங்களைப் படைத்துள்ளார். அவரது வீட்டில் அன்று முழுக்க இருந்து அனைத்து உணவுகளையும் ருசித்து சாப்பிட்டார் விநாயகர். 

வயிறு நிறைய சாப்பிட்டு முடிக்கும்போது நள்ளிரவு ஆகிவிட்டது. ஆனால் இன்னமும் சாப்பிட விரும்பிய விநாயகர் மிஞ்சிய மற்ற அனைத்து உணவுகளையும் ஒரு பையில் எடுத்துக்கொண்டு வீட்டை நோக்கி நடந்து சென்றார். 

சாப்பிட்ட களைப்பில் மெதுவாக நடத்த விநாயகர் தடுமாறி கீழே விழுந்துவிட்டார். அவர் கையில் இருந்த உணவும் கீழே விழுந்துச் சிதறிவிட்டது. உடனே எழுந்து தன் மேல் படிந்த மண்ணை உதறித்தட்டிய அவர், யாரும் பார்த்தார்களா என்று சுற்றும் முற்றும் பார்த்தார். நள்ளிரவு என்பதால் ஒருவரும் விழித்திருக்கவில்லை. எனவே சிதறிய பதார்த்தங்களை எடுத்துக்கொண்டு நிமிர்ந்த விநாயகர் வானில் நிலா இருப்பதைப் பார்த்தார். 

தன்னைப் பெரிய அழகன் என்று நினைத்துக்கொள்ளும் சந்திரன், விநாயகர் தள்ளாடி நடந்துவந்து கீழே விழுந்ததையும் மண்ணில் விழுந்த உணவுகளைப் பொறுக்கி எடுத்ததையும் பார்த்து கேலியாகச் சிரித்துக்கொண்டிருந்தான். இதைப் பார்த்த விநாயகருக்குக் கடுமையாக கோபம் வந்துவிட்டது. “என்னைப் பார்த்தா சிரிக்கிறாய்?” என்று ஆத்திரமாகக் கேட்டார் விநாயகர். 

“பெரிய தொந்தியையும் யானை முகத்தையும் பார்த்தால் எனக்குச் சிரிப்பு பொங்கிவந்துவிட்டது. அந்தக் கால்களை அசைத்து அசைத்து நடந்து வரும்போது கீழே விழுந்து புரண்டதைப் பார்த்தால்…” என்று மீண்டும் சிரிக்கத் தொடங்கினான் சந்திரன். 

அடக்கமுடியாத சினம் கொண்ட விநாயகர், “நீ செய்த தவறுக்கு இனிமேல் நீ வானில் தோன்றாமல் மறைந்து ஒழிவாய்” என சாபம் அளித்தார். அந்த காலத்தில் சந்திரன் மாதம் முழுவதும் ஒவ்வொரு நாளிலும் முழுமையாக வானில் தோன்றி ஒளிவீசுவான். விநாயகரின் சாபத்தால் தான் இனிமேல் தோன்றவே முடியாமல் போய்விடுமே என்று எண்ணினான் சந்திரன். தவறை உணர்ந்த அவன், “என் பிழை பொறுத்து மன்னிக்க வேண்டும் விநாயகப் பெருமானே!” என்று வேண்டிக்கொண்டான். 

கோபம் தணியாத விநாயகர், “உன் தவறுக்கு பாடம் கற்பிக்கிறேன். இன்னும் 15 நாட்களில் நீ மெல்லமெல்லத் தேய்ந்து முழுவதும் மறைந்துவிடுவாய். ஒருநாள் முழுக்க நீ மறைந்தே இருப்பாய். அடுத்த 15 நாட்களில் மீண்டும் முழு உருவத்தை அடைந்து ஒளிவீசுவாய். ஆனால் அதுவும் ஒருநாள்தான்.” என்று கூறினார். 

“சதுர்த்தி நாளில் என்னை அவமதித்தித்ததால் உனக்கு இந்த சாபம் ஏற்பட்டது. இனிமேல் சதுர்த்தியில் உன்னைப் பார்க்கும் அனைவருக்கும் நீ கேடுகளை விளைவிப்பாய்.” என்றும் சாபம் அளித்தார். 

புரட்டாசி மாதம் வளர்பிறையில் சதுர்த்தியில் விநாயகர் சதுர்த்தி கொண்டாடப்படுகிறது. சதுர்த்தி என்பது வளர்பிறை நாளின் நான்காவது நாள். விநாயகரை சந்திரன் அவமதித்த நாளும் சதுர்த்திதான்.

அன்று அவர் விநாயகரின் சாபத்தைப் பெறும் நிலை ஏற்பட்டது. அதனால், நான்காம் பிறை நாளில், அதாவது சதுர்த்தி அன்று யாராவது நிலாவைப் பார்த்தால் அவர்களுக்கு பிரச்னைகள் வரும் என்று சொல்கிறார்கள். ‘நான்காம் பிறையைப் பார்த்தால் நாய் படாத பாடு’ என்று சொல்வதையும் கேட்டிருப்போம். அதுவும் இதனால்தான்.