Sep 11

ஹீரோ முகமும் இல்லை தகுதியும் இல்லை: யோகி பாபு வேதனை

ஹீரோவாக நடிக்கும் அளவிற்கு முகமும் இல்லை, அதற்குத் தகுதியும் இல்லை என்று நடிகர் யோகி பாபு தனது வருத்தத்தை வெளிப்படுத்தியுள்ளார். 

நடிகர் யோகி பாபு தற்போதைய தமிழ் சினிமா உலகினால் தேடப்படும் காமெடி நடிகராக இருக்கிறார். இவர் சமீபத்தில் நடிகை நயன்தாராவுடன் கோலமாவு கோகிலா படத்தில் நடித்து இருந்தார். இந்தப் படத்தில் நயன்தாராவுக்கு இணையாக யோகி பேசப்பட்டார். இந்த நிலையில் அவர் பேசிய ஒரு வீடியோ வெளியாகியுள்ளது. அந்த வீடியோவில் அவர் கூறியிருப்பதாவது: 

நான் ஹீரோவாகதான் நடிப்பேன் , காமெடியனாக நடிக்கமாட்டேன் என்று போட்டுக் கொண்டு உள்ளனர். டுவிட்டர் மற்றும் பேஸ்புக்கில் பரப்பி வருகின்றனர். அந்த மாதிரி கிடையாது. ஹீரோவாக நடிக்கும் அளவிற்கு முகமும் இல்லை. தகுதியும் இல்லை. தயாரிப்பாளரை நஷ்டப்படுத்த விரும்பவில்லை. 

'எனக்கு இன்னொரு பெயர் இருக்கு' உள்பட பல படங்களை இயக்கிய சாம் ஆண்டன் என்னிடம் வந்து ஒரு கதை சொன்னார். ஒரு வெளிநாட்டுக்காரர், ஒரு நாய். அவர்கள் வழி தெரியாமல் வந்து என்னிடம் மாட்டிக் கொள்கின்றனர். மற்ற படங்களில் நடிப்பதைப் போலத்தான் இந்தப் படத்திலும் நடிக்கிறேன்.

மெயின் லீடு அந்த வெளிநாட்டுப் பெண்மணி மற்றும் நாய்தான். நான் ஒரு கூர்க்கா கேரக்டரில் நடிக்கிறேன். ஏற்கனவே ஒரு சில இயக்குனர்கள் என்னை அணுகினார்கள். அவர்கள் சொல்லி, அவர்கள் படத்தில் நான் நடிக்கவில்லை என்று நினைக்கிறார்கள். இயக்குனர் பாலாஜி மோகன் படத்திலும் நடிக்கிறேன். அதிலும் காமெடி ரோல் தான். நான் இறுதி வரை காமெடியானாக இருக்கவே விரும்புகிறேன். இதைதான் மக்கள் ஏற்றுக் கொண்டுள்ளனர்.இவ்வாறு அந்த வீடியோவில் தெரிவித்துள்ளார். 

ஹீரோவாக நடிக்க மட்டுமே யோகி விரும்புவதாக செய்தி வெளியான நிலையில் தற்போது மறுப்பு தெரிவித்து இந்த வீடியோவை வெளியிட்டுள்ளார்.