Jun 10

நியூசியை துவம்சம் செய்து சாதனை; வரலாற்று வெற்றி பெற்ற வங்கதேசம்...!

சாம்பியன்ஸ் லீக் தொடரில் நியூசிலாந்தை வென்று வங்கதேசம் சாதனை படைத்துள்ளது.

இங்கிலாந்தில் மினி உலகக் கோப்பை போட்டிகள் நடைபெற்று வருகின்றன. அதில் கார்டிப்பில் நடைபெற்ற 9வது லீக் போட்டியில், நியூசிலாந்து - வங்கதேச அணிகள் மோதின. டாஸ் வென்ற நியூசிலாந்து அணி, முதலில் பேட்டிங்கை தேர்வு செய்தது.நிதானமாக ஆட்டத்தை தொடங்கிய நிலையில், கப்டில் 33 ரன்களுக்கும், ரோஞ்சி 16 ரன்களுக்கும் ஆட்டமிழந்தனர்.

வில்லியம்சன் 57 ரன்களும், அதிகபட்சமாக டெய்லர் 63 ரன்களும் எடுத்தனர். 50 ஓவர்கள் முடிவில் நியூசிலாந்து அணி 8 விக்கெட்களை இழந்து 265 ரன்கள் எடுத்தது. வங்க தேச அணி சார்பில் மொசடெக் ஹுசைன் 3 விக்கெட்கள் வீழ்த்தினார். இதைத் தொடர்ந்து களமிறங்கிய வங்கதேச அணிக்கு தொடக்கமே ஆட்டம் கண்டது. தமிம் இக்பால் டக் அவுட் ஆனார். சௌமியா சர்கார் 3, சபீர் ரஹ்மான் 8 முசபிர் ரஹிம் 14 ரன்களில் ஆட்டமிழந்தனர்.

இதையடுத்து களமிறங்கிய ஷகிப் அல் ஹசன் 114, முஹ்மதுல்லா 102 ரன்களும் எடுத்து அணியின் வெற்றிக்கு வித்திட்டனர். இறுதியாக 47.2 ஓவர்களில் 5 விக்கெட்கள் இழந்து, வங்கதேச அணி வெற்றி பெற்றது. ஷகிப் அல் ஹசன் ஆட்ட நாயகன் விருதை பெற்றார். சாம்பியன்ஸ் தொடரில் முதல் முறையாக நியூசியை வென்று வங்கதேசம் சாதனை படைத்துள்ளது. மேலும் வங்கதேச அணி பார்ட்னர்ஷிப்பில் 224 ரன்கள் எடுத்து சாதனை செய்துள்ளது.