Sep 04

பிச்சையெடுத்த 94 ரூபாயை கேரளா நிவாரண நிதிக்கு கொடுத்த பிச்சைக்காரர்!

கோட்டயத்தைச் சேர்ந்த மோகனன் என்பவர் தான் பிச்சையெடுத்து சேர்த்து வைத்த 94 ரூபாயை கேரளா நிவாரண நிதிக்கு அனுப்பி வைத்துள்ளார். 

கேரள மாநிலத்தில் கடந்த 100 ஆண்டுகளில் இல்லாத அளவிற்கு ஏற்பட்ட பெரு வெள்ளம் காரணமாக 370 பேருக்கும் அதிகமானவர்கள் உயிரிழந்தனர். ரூ.20,000 கோடி மதிப்பிலான பொருட்கள் சேதம் அடைந்துள்ளது. லட்சக்கணக்கானவர்களின் வீடுகள் நாசமாகியுள்ளன. 

இந்நிலையில், வெள்ளத்திற்குப் பின் சீரடைந்து வரும் அம்மாநிலத்தில் தொற்றுநோய்களால் பலர் உயிரிழந்துள்ளனர். கடந்த இரண்டு வாரங்களில் 50 பேர் வரை இறந்துள்ளனர். 6 பேர் லெப்டோஸ்பிரோசிஸ் நோயினால் பாதிக்கப்பட்டு இறந்தது உறுதியாகியுள்ளது. 34 பேரின் இறப்புக்கு லெப்டோஸ்பிரோசிஸ் காரணமாக இருக்கலாம் என சந்தேகிக்கப்படுகிறது.

9 பேர் காய்ச்சலால் உயிரிழந்துள்ளனர். அவர்களில் ஒருவர் டெங்கு காய்ச்சலால் மரணமடைந்துள்ளார். இந்த நிலையில், கேரளா மாநிலத்தில் உள்ள ஆலுவா பகுதியில் மீட்புப் பணிகள் திவீரமாக நடந்து வருகிறது.

பலரும் நிதியுதவி வழங்கிய நிலையில், கோட்டையம் மாவட்டத்திலுள்ள பூஞ்சார் என்ற கிராமத்தைச் சேர்ந்த மோகனன் என்ற பிச்சைக்காரரும் தான் பிச்சையெடுத்து சேர்த்து வைத்த 94 ரூபாயை கேரளா நிவாரண நிதிக்கு அனுப்பி வைத்துள்ளார்.

இது குறித்து எரட்டுப்பேட்டா பகுதியின் முன்னாள் நகராட்சி தலைவர் ரஷீத் கூறுகையில், என்னுடைய வீட்டிற்கு வந்த பிச்சைக்காரர் மோகனன் வீட்டிற்கு வெளியில் நாணயங்களை எண்ணிக் கொண்டிருந்தார்.

எண்ணி முடித்த பிறகு தன்னிடமிருந்த ரூ.94 ஐ கேரளா நிவாரண நிதிக்கு அனுப்பி வைக்குமாறு என்னிடம் கொடுத்தார் என்று அவர் குறிப்பிட்டுள்ளார். இதனை ரஷீத் தனது சமூக வலைதள பக்கத்தில் பதிவிட்டுள்ளார்.