Aug 31

கேரள வெள்ள பாதிப்பை நேரில் பார்வையிட்ட நீடா அம்பானி; மறுசீரமைப்பிற்கு உறுதுணை!

வெள்ளம் பாதித்த பகுதிகளை நேரில் பார்வையிட்டு, உரிய உதவிகள் அளிக்க நீடா அம்பானி முன்வந்துள்ளார். 

ரிலையன்ஸ் தொண்டு நிறுவனத்தின் தலைவர் நீடா அம்பானி, வெள்ளத்தால் பாதிக்கப்பட்ட கேரள மாநிலத்திற்கு சென்றார். ஆலப்புழா மாவட்டத்தில் மிகவும் பாதிக்கப்பட்ட பள்ளிப்பட்டு கிராமத்திற்கு சென்றார். 

அங்கு பொதுமக்களை நேரில் சந்தித்து, தேவையான உதவிகள் குறித்து கேட்டறிந்தார். கேரள மாநிலத்தின் நீண்ட கால மறுசீரமைப்பிற்கு உதவிக்கரம் நீட்டத் தயாராக இருப்பதாக நீடா அம்பானி தெரிவித்துள்ளார். 

ரிலையன்ஸ் தொண்டு நிறுவனம் சார்பில் கேரள முதலமைச்சர் நிவாரண நிதிக்கு ரூ.21 கோடி வழங்கப்பட்டுள்ளது. மேலும் ரூ.50 கோடி மதிப்பிலான நிவாரணப் பொருட்கள் அளிக்கப்பட்டுள்ளன.மீட்பு மற்றும் நிவாரணப் பணிகளுக்காக ரிலையன்ஸ் தொண்டு நிறுவனத்தைச் சேர்ந்த 30 பேர் கொண்ட குழுவினர் ஈடுபட்டுள்ளனர். கேரள மாநிலத்தின் எர்ணாகுளம், வயநாடு, ஆலப்புழா, திருச்சூர், இடுக்கி, பத்தினம்திட்டா ஆகிய 6 மாவட்டங்களில் களப்பணிகளை மேற்கொண்டு வருகிறது. 

முன்னதாக கேரள முதலமைச்சர் பினராயி விஜயனை நேரில் சந்தித்த நீடா அம்பானி, பாதிக்கப்பட்ட மக்களுக்கு உறுதுணையாக இருப்பதாக கூறினார். மாநிலத்தின் மறுகட்டமைப்பிற்கு இயன்ற உதவிகளைச் செய்ய தயாராக இருப்பதாக தெரிவித்தார்.