Aug 29

அதிர்ச்சி தகவல்! நாட்டில் விதிமுறைகளின்படி இயங்கும் குழந்தைகள் காப்பகங்கள் வெறும் 54 மட்டுமே !

பெரும்பாலான குழந்தைகள் காப்பகங்கள் விதிகளுக்கு புறம்பாக செயல்படுவது தெரியவந்துள்ளது. 

உச்சநீதிமன்றத்தில் தேசிய குழந்தைகள் உரிமை பாதுகாப்பு ஆணையம் ஆவணப் பத்திரம் ஒன்றை தாக்கல் செய்துள்ளது. அது உச்சநீதிமன்ற நீதிபதிகளையே பெரும் அதிர்ச்சிக்கு ஆளாக்கியுள்ளது. அதாவது நாட்டின் பெரும்பாலான குழந்தைகள் பாதுகாப்பு மையங்கள் முக்கிய விதிமுறைகளை பின்பற்றுவதில்லை எனத் தெரியவந்துள்ளது. 

இதுதொடர்பாக வழக்கறிஞர் அனிந்திடா புஜாரி சார்பில் தேசிய குழந்தைகள் உரிமை பாதுகாப்பு ஆணையம் தாக்கல் செய்த ஆவணப் பத்திரத்தில், நாடு முழுவதும் குழந்தைகள் காப்பகங்களில் ஆய்வுகள் நடத்தப்பட்டன.

அதில் முதல்கட்ட படிநிலையிலேயே பெறப்பட்ட தகவல்கள் பெரும் அதிர்ச்சியளிக்கின்றன. ஏனெனில் ஒரு சில காப்பகங்களே குழந்தைகள் பாதுகாப்புச் சட்டம் 2015ன் படி நேர்மறையான அம்சங்களைப் பெற்றுள்ளன. 

உத்தரப் பிரதேச மாநிலம் டியோரியா மற்றும் பீகார் மாநில முசாபர்பூர் ஆகிய இடங்களில் குழந்தைகள் காப்பகங்கள் என்ற பெயரில் பெண் குழந்தைகள் பெரிதும் சீரழிக்கப்பட்டுள்ளனர்.

இதைத் தொடர்ந்து ஒட்டுமொத்த காப்பகங்கள் குறித்து ஆய்வு நடத்துமாறு உச்சநீதிமன்றம் உத்தரவிட்டது. இதுதொடர்பாக சமர்பிக்கப்பட்ட ஆவணப் பத்திரத்தில், மொத்தமுள்ள 2,874 குழந்தைகள் காப்பகங்களில் வெறும் 54 மட்டுமே 6 குழுவினரிடம் இருந்து நேர்மறையான விமர்சனங்களைப் பெற்றுள்ளன.

அதேபோல் 185 தங்கும் விடுதிகளை ஆய்வு செய்ததில், வெறும் 19 விடுதிகள் மட்டுமே குழந்தைகள் தொடர்பான 14 ஆவணங்களையும் வைத்திருக்கின்றன. சிறப்பு தத்தெடுப்பு ஏஜென்சிகளைப் பொறுத்துவரை ஆய்வு செய்யப்பட்ட 203ல் வெறும் 8 மட்டுமே 6 குழுவினரிடம் இருந்து நேர்மறையான விமர்சனங்களைப் பெற்றுள்ளன. 

172 அப்சர்வேஷன் ஹோம்களில் வெறும் 5 மட்டுமே அனைத்துக் குழுவினரிடம் இருந்து நேர்மறையான விமர்சனங்களைப் பெற்றுள்ளன. மேலும் 80 சிறப்பு இல்லங்களில் வெறும் 3 மட்டுமே உரிய விதிமுறைகளின் படி இயங்கி வருகின்றன. இந்த வழக்கை மறு விசாரணைக்காக வரும் செப்டம்பர் 25ஆம் தேதிக்கு உச்சநீதிமன்றம் ஒத்திவைத்துள்ளது.