Aug 28

கொள்கையே இல்லாத கட்சிகள் மீது அக்கறை செலுத்த வேண்டாம்: மு.க.ஸ்டாலின்!

தமிழ்நாட்டில் இருக்கும் கொள்கையே இல்லாத கட்சிகள் மீது, நாம் அக்கறை செலுத்த வேண்டாம் என மு.க.ஸ்டாலின் கூறியுள்ளார். 

இதுதொடர்பாக மு.க.ஸ்டாலின், திமுக தொண்டர்களுக்கு எழுதியுள்ள கடிதத்தில் கூறியிருப்பதாவது: மறைந்தார் என்று இயற்கை சொன்னாலும் யாருக்கும் அதை ஏற்கச் சிறிதும் மனம் இடம் தராததால், தமிழரின் வாழ்வெல்லாம் நிறைந்தார் என்பதே கருணாநிதியின் பெருமையாக அமைந்துள்ளது. நாள்தோறும் அவர் நினைவிடத்திற்கு ஆயிரம் ஆயிரமாய் வரும் அனைத்துத் தரப்பு தமிழ் மக்களின் உள்ளன்புடன் கூடிய அஞ்சலிகளும், ஊர்தோறும் பொதுமக்களுடன் இணைந்து தி.மு.க.வினர் நடத்துகின்ற இரங்கல் கூட்டங்களும் நினைவேந்தல் ஊர்வலங்களும் ஓய்வறியா அந்த சூரியன் ஒருபோதும் மறையவே இல்லை என்பதைத்தான் நமக்கு நினைவூட்டிக்கொண்டிருக்கிறது. 

பன்முகத் திறமை கொண்ட கருணாநிதியின் புகழுக்கு வணக்கம் செலுத்தும் நினைவேந்தலை தலைமைக்கழகம் சார்பில் தமிழ்நாட்டின் முக்கிய நகரங்களில் நடத்தி வருகிறோம்.

பத்திரிகையாளர் கருணாநிதிக்கு திருச்சியிலும், இலக்கியவாதி கருணாநிதிக்கு மதுரையிலும், கலைத்துறை வித்தகர் கருணாநிதிக்கு கோவையிலும் எழுச்சியோடும், உணர்ச்சியோடும் உள்ளன்போடும் நடைபெற்ற மாபெரும் நினைவேந்தல் நிகழ்வுகளைத் தொடர்ந்து நெல்லைச் சீமை பாளையங்கோட்டையிலே தமிழ்நாட்டின் அனைத்துக் கட்சித்தலைவர்கள் பங்கேற்ற, அரசியல் ஆளுமை கலைஞர் என்ற தலைப்பிலான பெருந்திரள் நினைவேந்தல் பொதுக்கூட்டம் பொங்கும் கடலென நடந்தேறியிருக்கிறது. 

தமிழ்நாட்டில் கொள்கையே இல்லாத கட்சிகளும் உண்டு. அவர்கள் குறித்து நாம் அக்கறை செலுத்த வேண்டியதில்லை. கொள்கை அளவில் நமக்கு உறவாகவும், எதிராகவும் இருப்பவர்கள் யாராக இருந்தாலும் அவர்களை அரவணைத்தும் எதிர்கொண்டும் நின்றதில் கருணாநிதியின் அரசியல் மாண்பு போற்றுதலுக்குரியது. அதனால்தான், மாறுபட்ட கொள்கை கொண்டவர்களும் அந்த மாண்பை நெல்லை மேடையில் பாராட்டினார்கள்.

கருணாநிதி என்ற சகாப்தம் பற்றி தமிழ்நாட்டில் உள்ள அனைத்துக்கட்சித் தலைவர்களும் நெல்லையிலே நினைவுரை வழங்கி புகழ் மாலை சூட்டியுள்ள நிலையில், வருகிற 30-ந்தேதி தமிழகத்தின் தலைநகர் சென்னையிலே அகில இந்திய அரசியல் தலைவர்கள் புகழ் வணக்கம் செலுத்தவிருக்கிறார்கள். 

எல்லையில்லா புகழ் மழையாய் நெல்லையில் பொழிந்த தலைவர்களின் உரைகளும், சென்னையில் நிகழவிருக்கும் நினைவேந்தலில் வெளிப்படவுள்ள முழக்கங்களும் கருணாநிதியால் திராவிட இயக்கம் பெற்ற வெற்றியின் அடையாளம். தமிழ்நாடு பெற்ற நாகரிக உயர்வின் வெளிப்பாடு. 

இந்திய நாட்டிற்கு வழிகாட்டிய ஜனநாயக விளக்கு. இந்த உரைகளையெல்லாம் சிறு புத்தகங்களாக வெளியிடுவதுடன், நவீன தொழில்நுட்பமான சமூக வலைத்தளத்திலும், இணையத்திலும் இவற்றை சிறுசிறு பகுதிகளாகப் பதிவேற்றி, தி.மு.க. தொண்டர்களிடமும் தமிழ்நாட்டு மக்களிடமும் கொண்டு சேர்க்க வேண்டிய கடமை, தொண்டர்கள் ஒவ்வொருவருக்கும் உள்ளது.

அதற்கான பணியை உங்களில் ஒருவனான நான் கவனத்துடன் செயல்படுத்துவேன். பெரியார், அண்ணா வழியில் கருணாநிதி மேற்கொண்ட லட்சியப்பயணத்தை அவர் விட்ட இடத்திலே இருந்து தொடருவோம். ஆயிரம் காலத்துப் பயிரான திராவிட இயக்கத்தையும் அதன் கொள்கைகளையும் கருணாநிதி மீது ஆணையிட்டுக் காப்போம். இவ்வாறு அந்த கடிதத்தில் தெரிவிக்கப்பட்டுள்ளது.