Jun 07

66,000 ரூபாய் நோட்டுக்களை மென்னு விழுங்கிய அதிசய ஆடு!!

உத்திரப்பிரதேச மாநிலத்தில் விவசாயி ஒருவர் தனது பேன்ட் பாக்கெட்டில் வைத்து இருந்த 66,000 ரூபாய் நோட்டுக்களை ஆடு சாப்பிட்டது அதிர்ச்சியை ஏற்படுத்தியுள்ளது.

உத்தரப்பிரதேச மாநிலம் கன்னாஜ் மாவட்டத்தில் சிலாவ்பூர் கிரமாத்தைச் சேர்ந்தவர் சர்வேஸ் குமார் பால். விவசாயியான இவர் வீடு கட்டுவதற்காக செங்கல் வாங்க தனது பேன்ட் பாக்கெட்டில் ரூ. 66,000 வைத்து இருந்தார். இதை இவர் வளர்த்து வந்த ஆடு சாப்பிட்டுக் கொண்டு இருந்ததைப் பார்த்து அதிர்ச்சி அடைந்தார்.

அனைத்தும் ரூ. 2,000 நோட்டுக்கள். எப்படியாவது ரூபாய் நோட்டுக்களை பறித்துவிட வேண்டும் என்று முயற்சித்தார். ஆனால், அவரால் பறிக்க முடியவில்லை. இறுதியில் இரண்டு 2,000 ரூபாய் நோட்டுக்கள் மட்டுமே அவரால் பறிக்க முடிந்தது. அதுவும் பயன்படுத்த முடியாத நிலையில் இருந்தது.

இதுகுறித்து விவசாயி சர்வேஸ் கூறுகையில், ''எனது பேன்ட் பாக்கெட்டில் பணத்தை வைத்துவிட்டு குளித்துக் கொண்டு இருந்தேன். அப்போது பணத்தை எடுத்து ஆடு சாப்பிட்டுள்ளது. அதற்கு பிடித்த உணவு போல் அதை சாப்பிட்டுள்ளது. ஆடு எனக்கு குழந்தை போன்றது என்ன செய்வது. வாந்தி எடுக்க வைக்க கால்நடை மருத்துவரிடம் ஆட்டை எடுத்து செல்ல வேண்டும் என்று சிலர் கூறினர்.

சிலரோ, ஆட்டை கசாப்புக் கடைக்கு எடுத்து செல்ல வேண்டும் என்று கூறினர். குற்றம் செய்த இந்த ஆட்டை போலீசாரிடம் ஒப்படைக்க வேண்டும் என்று சிலர் கூறினர். ஆனால், எங்களது ஆட்டை அவ்வாறு செய்ய நானும், எனது மனைவியும் விரும்பவில்லை'' என்றார்.

அக்கம் பக்கத்தில் இருந்த பலரும் அதிசயமாக இந்த ஆட்டை வேடிக்கை பார்த்து சென்றனர். பலர் இந்த ஆட்டுடன் செல்பி எடுத்து சென்றனர்.