Aug 25

கர்நாடகா அமைச்சருடன் வாக்குவாதத்தில் ஈடுபட்ட நிர்மலா சீதாராமன்

பயண திட்டத்தில் இல்லாத காரியங்களை செய்ய வைத்ததாக கூறி கர்நாடகா மாநில அமைச்சருடன், மத்திய அமைச்சர் நிர்மலா சீதாராமன் வாக்குவாதத்தில் ஈடுபட்டார். 

தென்மேற்கு பருவ மழை காரணமாக கர்நாடகா மாநிலம் குடகு மாவட்டம் பெருத்த வெள்ள சேதங்களை சந்தித்துள்ளது. பாதுகாப்பு துறை அமைச்சர் நிர்மலா சீதாராமன் அப்பகுதிகளை நேரில் சென்று ஆய்வு செய்தார். 

தொடர்ந்து அவர், ஆர்.எஸ்.எஸ். அமைப்பின் சார்பில் அமைக்கப்பட்டுள்ள பொதுமக்களின் நிவாரண முகாமிற்கு சென்று மக்களை சந்தித்ததாகவும், முன்னாள் ராணுவ அதிகாரிகளை சந்தித்து பேசியதாகவும் கூறப்படுகிறது. 

அதை தொடர்ந்து செய்தியாளர்களை சந்திக்க அரங்கம் வந்த நிர்மலா சீதாராமன், கர்நாடகா மாநில அமைச்சர் மகேஷிடம், தனது பயண திட்டத்தில் குறிப்பிடப்படாத காரியங்களை செய்து வைத்து விட்டதாக வாக்குவாதம் செய்தார்.

மத்தியமைச்சராக இருந்து கொண்டு மாநில அமைச்சரின் உத்தரவுகளை பின்பற்ற வேண்டி உள்ளது. அலுவல் ரீதியாக பணிகள் தான் முக்கியமானது. திட்டமிட்டபடியான நிகழ்ச்சிகளை பின்பற்ற வேண்டியது முக்கியம். எனது பணியிலிருந்து எதையும் மீறவில்லை. என்று மத்திய அமைச்சர் நிர்மலா சீதாராமன், மாநில அமைச்சர் மகேஷிடம் கோபமாக பேசினார். 

இதை தொடர்ந்து செய்தியாளர்கள் அவரை சத்தமாக பேசும்படி கூறவே. அந்த உரையாடல்களை தாராளமாக பதிவு செய்து கொள்ளலாம். அதனால் எந்த பிரச்னையும் இல்லை. தேவையானதை பதிவு செய்து கொள்ளுங்கள் என்று நிர்மலா சீதாராமன் செய்தியாளர்களிடம் பேசினார்.