Aug 24

புதிய பாதுகாப்பு அம்சங்களுடன் களமிறங்கும் பஜாஜ் பல்சர் என்.எஸ் 160 பைக்

பஜாஜ் நிறுவனம் தயாரித்துள்ள பின்பக்க டிஸ்க் பிரேக்குடன் கூடிய பல்சர் என்.எஸ். 160 மோட்டார் சைக்கிள் விரைவில் இந்தியாவில் விற்பனைக்கு வரவுள்ளன. இதற்கான ஆரம்பக்கட்ட பணிகளை அந்நிறுவனம் தற்போது தொடங்கியுள்ளது. 

இந்த பைக்கில், அலாய் சக்கர அமைப்புகள் புதியதாக வழங்கப்பட்டுள்ளன. தற்போது இதற்கான விநியோகப் பணிகள் தொடங்கியுள்ள நிலையில், பல்சர் என்.எஸ். 160 பைக்கிற்கு பஜாஜ் நிறுவனம் ரூ. 82,630 ( புனே எக்ஸ்ஷோரும்) விலையை நிர்ணயித்துள்ளதாக தெரிகிறது. 

தற்போது பயன்பாட்டில் உள்ள இந்த மாடல் பைக்கில் பின்பக்க டிரம் பிரேக் அமைப்பு இடம்பெற்றுள்ளது. இந்த மாடல் விலையை விட இந்த புதிய பின்பக்க டிஸ்க் பிரேக் கொண்ட பைக் ரூ. 2000 கூடுதல் விலை பெறுவது குறிப்பிடத்தக்கது. 

நிறுத்த அமைப்புகளை தவிர இந்த மாடல் மோட்டார் சைக்கிள் வேறு எந்த மாற்றமும், கட்டமைப்புகளும் மேற்கொள்ளப்படவில்லை. பயன்பாட்டில் இருக்கும் மாடலின் அடிப்படையிலேயே இது விற்பனைக்கு வரவுள்ளது

பஜாஜின் ப்ரீமியம் தர பல்சர் என்.எஸ். 160 பைக்கில் 160.3 சிசி இழுவைத் திறன் கொண்ட 4 வால்வுடன் கூடிய சிங்கிள் சிலிண்டர் எஞ்சின் உள்ளது. இது 15.5 பிஎச்பி பவர் மற்றும் 14.6 என்.எம் டார்க் திறனை வழங்கவல்லது. 

142 எடை கொண்ட இந்த மோட்டார் சைக்கிளில் பஜாஜ் நிறுவனம் 5 ஸ்பீடு கியர்பாக்ஸ் அம்சத்தை பொருத்தியுள்ளது குறிப்பிடத்தக்கது. 

தற்போது பயன்பாட்டில் உள்ள பல்சர் எஸ்.எஸ். 160 மாடல் அமோக விற்பனையை பெற்று வருகிறது. எனினும் நவீன பாதுகாப்பு கட்டமைப்புகளுடன் மேம்படுத்தப்பட்ட புதிய மாடல் அதே வரவேற்பை தக்கவைக்குமா என்பதை பொறுத்திருந்து தான் பார்க்க வேண்டும். 

இந்திய வாகனச் சந்தையில் புதிய பஜாஜ் பலசர் என்.எஸ் 160 பைக், டிவிஎஸ் அப்பாச்சி ஆர்டிஆர் 160 4வி, ஹோண்டா சிபி ஹார்னெட் மற்றும் சுஸுகி ஜிக்ஸர் உள்ளிட்ட மோட்டார் சைக்கிள்களுக்கு போட்டியாக இருக்கும்.