Aug 22

மதத் தடைகளை தகர்த்தெறிந்த வெள்ளம்: இந்து கோயில்களை சுத்தம் செய்த முஸ்லீம் இளைஞர்கள்!

கேரள மாநிலம், வயநாடு மற்றும் மலப்புரம் மாவட்டங்களில் வெள்ளத்தால் சேதமடைந்த இந்து கோயில்களை முஸ்லீம் இளைஞர்கள் சீரமைத்து வரும் சம்பவம் நெகிழ்ச்சியை ஏற்படுத்தியுள்ளது. 

கேரள மாநிலம் வயநாட்டில் உள்ள வென்னியோட் ஆற்றில் ஏற்பட்ட பெருவெள்ளத்தால், இங்குள்ள ஸ்ரீ மஹா விஷ்னு கோயில் வெள்ளத்தில் மூழ்கியது. இந்நிலையில் தற்போது வெள்ளம் வடிந்த நிலையில், கோயில் முழுவதும் சேறு மற்றும் சகதியால் நிரம்பி அலங்கோலமாக காட்சியளித்தது. இதனையடுத்து நிவாரண பணிகளுக்காக தங்களை அர்ப்பணித்த முக்கம் பகுதியைச் சேர்ந்த முஸ்லீம் இளைஞர்கள் கோயிலை சீரமைக்கும் முயற்சியில் ஈடுபட்டனர். 

இதுகுறித்து நிவாரண பணியில் ஈடுபட்ட ஐக்கிய அரபு அமீரகத்தைச் சேர்ந்த இன்ஞ்னியர் நஜ்முதீன் கூறுகையில், நாங்கள் முஸ்லீம் ஆனாலும் அருகிலுள்ள கோயிலை புணரமைக்க நாங்களும் உதவுவதாக கோயில் நிர்வாகத்தினரிடம் கூறினோம். அவர்களும் மகிழ்ச்சியாக இதற்கு ஒப்புக்கொண்டனர் என்று தெரிவித்தார். 

இந்நிலையில் முஸ்லீம் இளைஞர்களுடைய முயற்சிகள் சாதியையும் மதத்தையும் மீறி ஒற்றுமையை உயர்த்திக் காட்டியதாகவும், இக்கட்டான நேரத்தில் வந்து உதவி செய்த இளைஞர்களுக்கு பாரட்டுகளை தெரிவிப்பதாகவும், மூத்த கோயில் அதிகாரி, கே பாலகிருஷ்ணன் கூறினார். 

இதேபோல் மன்னர்காடு சமஸ்தானத்தைச் சேர்ந்த சன்னி மாணவர் கூட்டமைப்பு தொண்டைச் சேர்ந்த 20 முஸ்லீம் இளைஞர்கள், வெள்ளத்தால் கடுமையாக சேதமடைந்த மன்னர்காட் ஐயப்பன் கோயிலை சுத்தம் செய்தனர். கொல்புழா ( Kolpuzha) அருகே அமைந்துள்ள இந்த கோயில், நான்கு நாட்களுக்கு முன், சேறு மற்றும் சகதியால் முழுவதுமாக முடியிருந்தது.