Jun 06

மீண்டும் தாய்மொழியில் மம்முட்டியுடன் நடிக்கும் மகிமா நம்பியார்!

நடிகை மகிமா நம்பியார் தாய்மொழியான மலையாளத்தில் மீண்டும் நடிகர் மம்முட்டியுடன் ஒரு படத்தில் நடிக்கிறார்.

‘மைனா’ படத்தில் அமலாபாலுக்கு பதில் நடிக்க வேண்டியவர் மகிமா நம்பியார்தான். அப்போது அவர் பள்ளியில் படித்துக் கொண்டிருந்ததால் அந்த வாய்ப்பு அமலாபாலுக்கு சென்றது. முதன் முதலில் ‘காரியஸ்தன்’ என்ற மலையாளப்படத்தில் ஹீரோவுக்கு தங்கையாக நடித்தார் மகிமா. அதன் பிறகு தான் தமிழில் ‘சாட்டை’ படம் மூலம் அறிமுகமானார். ‘என்னமோ நடக்குது’, ‘மொசக்குட்டி’, ‘அந்தாதி’, ‘குற்றம் 23’ ஆகிய படங்களில் நடித்து முடித்து விட்டார். தற்போது ‘அண்ணனுக்கு ஜே’, ‘ஐங்கரன்’, ‘இரவுக்கு ஆயிரம் கண்கள்’ படத்தில் நடித்து வருகிறார்.

இந்த நிலையில் மகிமா தனது சொந்த மொழியான மலையாளத்தில் மீண்டும் நடிக்கிறார். மம்முட்டி நடிக்கும் ‘மாஸ்டர்பீஸ்’ என்ற படத்தில் முக்கிய கேரக்டரில் நடிக்க ஒப்பந்தமாகியிருக்கிறார். அஜய் வாசுதேவ் இயக்கும் இந்தப் படத்தில் மம்முட்டியுடன் உன்னி முகுந்தன், சந்தோஷ் பண்டிட், வரலட்சுமி ஆகியோரும் நடிக்கிறார்கள். இந்தப் படத்திற்கு பிறகு தொடர்ந்து மலையாளப் படத்தில் நடிக்க முடிவு செய்திருக்கிறார் மகிமா.