Aug 21

கேரளா மக்களுக்கு ரூ.50 கோடி உதவிய என்.ஆர்.ஐ மலையாளி!

கேரளா வெள்ளத்தால் பாதிக்கப்பட்ட மக்களுக்கு உதவும் வகையில், அபுதாபி தலைமையகத்தில் உள்ள விபிஎஸ் சுகாதார பராமரிப்பு அலுவலகத்தின் தலைவரான கேரளாவைச் சேர்ந்த ஷாம்ஷீர் வயாலில் ரூ.50 கோடி கொடுத்துள்ளார். 

கேரளாவில் கடந்த 100 ஆண்டுகளில் இல்லாத வகையில் கனமழை பெய்துள்ளதாகவும், வெள்ளம் மற்றும் நிலச்சரிவில் சிக்கி உயிரிழந்தவா்களின் எண்ணிக்கை 324ஆக உயா்ந்துள்ளதாக அம்மாநில முதல்வா் பினராயி விஜயன் அறிவித்துள்ளார். 

சுமார் 26 ஆண்டுகளுக்கு பிறகு முதன்முறையாக இடுக்கி அணை திறக்கப்பட்டதால், அம்மாநிலத்தில் உள்ள ஆறுகளில் வெள்ளம் கரைபுரண்டு ஓடுகிறது. இந்த நிலையில் கடந்த சில நாட்களாக மீண்டும் மழை பெய்து வருவதால் கேரளா மக்கள் மத்தியில் அச்சம் ஏற்பட்டுள்ளது.

பல கிராமங்கள் வெள்ளத்தில் மிதந்து வருவதால், அங்கு வசிக்கும் மக்கள் உண்ண உணவு, குடிக்க நீரின்றி தவிக்கும் நிலை ஏற்பட்டுள்ளது. இந்நிலையில், கேரளா மக்களுக்கு உதவும் வகையில், தங்களால் முயன்ற பொருளுதவி, உணவு போன்றவற்றை கொடுத்து வருகின்றனர்.

மேலும், வெள்ளத்தால் பாதிக்கப்பட்ட மக்களுக்கு உதவும் வகையில், நடிகர்கள் சூர்யா மற்றும் கார்த்தி, கமல் ஹாசன் ஆகியோர் தலா ரூ.25 லட்சமும், நடிகை ஸ்ரீபிரியா மற்றும் அவருடைய கணவர் ராஜ்குமார் சேதுபதி இருவரும் இணைந்து ரூ.10 லட்சமும் நிதியுதவி அளித்துள்ளனர்.

இந்த நிலையில், கேரளாவைச் சேர்ந்த டாக்டர் ஷாம்ஷீர் வயாலில் அபுதாபி தலைமையகத்திலுள்ள சுகாதார பராமரிப்பு அலுவலகத்தின் தலைவராக உள்ளார். இவர், வெள்ளத்தால் பாதிக்கப்பட்ட மக்கள் பயன்பெறும் வகையில், ரூ.50 கோடி வழங்கியுள்ளார்.

இதன் மூலம், வீடுகளை இழந்தவர்களுக்கு வீடுகள் அமைப்பதற்கும், சுகாதார வசதிக்கும் மற்றும் கல்வி என்றெல்லாம் பாதிக்கப்பட்டவர்கள் பயன்பெற்றுக்கொள்ளலாம். கேரளா மக்களுக்கு ஒரு தனிநபர் வழங்கிய அதிகப்பட்ச தொகை இது என்பது குறிப்பிடத்தக்கது.

மேலும், கேரளாவின் பாதிப்பைத் தொடர்ந்து அங்கு பக்ரீத் மற்றும் ஓணம் பண்டிகை கொண்டாடுவது நிறுத்தப்பட்டுள்ளது. விபிஎஸ் சுகாதார அமைப்பில் இந்தியா மற்றும் ஐரோப்பா ஆகிய நாடுகளில் கிட்டத்தட்ட 22 மருத்துவமனை மற்றும் 125 மருத்துவ மையங்கள் இயங்கி வருகின்றன என்று வயாலி கூறியுள்ளார்.