Aug 18

பயங்கரவாதிகள் கொடூர தாக்குதல் - ஆப்கனில் 1000 பள்ளிகள் மூடல்

ஆப்கானிஸ்தானில் பயங்கரவாதிகள் ஷியா பிரிவினரை குறிவைத்து தாக்குதல் நடத்தியதனால், அச்சத்தில் 1000 பள்ளிகள் மூடப்பட்டுள்ளன. 

ஆப்கானிஸ்தானில் பயங்கரவாதிகள் தாக்குதல் நடத்துவது சர்வ சாதாரணமாகி விட்டது. குறிப்பாக ஷியா பிரிவினரை குறிவைத்து தாக்குதல் நடத்தப்பட்டு வருகின்றது. 

கடந்த சில தினங்களுக்கு முன்னர் காபூலில் உள்ள தனியார் கல்வி மையத்தில் நடத்தப்பட்ட பயங்கரவாத தாக்குதலில் 48 மாணவ, மாணவிகள் கொல்லப்பட்டனர். 67 பேர் படுகாயமடைந்தனர். 

காபூலின் டஸ்த்-ஈ-பராச்சி என்ற இடத்தில் அமைந்துள்ள மவூத் அகாடெமி என்ற கல்வி நிறுவனத்தில், கல்லூரி மாணவர்களுக்கு பயிற்சி அளிக்கப்பட்டு வந்தது. இங்கு அதிகளவில் ஷியா பிரிவு இஸ்லாமியர்கள் தங்கியிருக்கும் பகுதியை குறிவைத்து தாக்குதல் நடத்தப்பட்டுள்ளது.

இந்த தாக்குதலுக்கு ஐ.எஸ் பிரிவு தீவிரவாத அமைப்பு பொறுப்பேற்றுள்ளது. தாக்குதல் நடத்தப்பட்டு வருவதால் அச்சத்தில் உறைந்த பெற்றோர்கள் தங்கள் பிள்ளைகளை பள்ளிக்கு அனுப்ப மறுத்து வருகின்றனர். இதனால் நாடு முழுவதும் 1000க்கும் மேற்பட்ட பள்ளிகள் மூடப்பட்டுள்ளன.