Aug 17

ஆறுதல் பெற முடியாமல் தவிக்கிறோம் - வாஜ்பாய்க்கு அஞ்சலி செலுத்திய தமிழிசை

பா.ஜ.க கட்சியின் பிதாமகனும், இந்தியாவின் மிக மூத்த அரசியல் தலைவருமான அடல் பிகாரி வாஜ்பாய் தனது 93-வது வயதில் டெல்லி எய்ம்ஸ் மருத்துவமனையில் காலமானார். மிகச்சிறந்த பேச்சாளரும், கவிஞரும், மாபெரும் அரசியல் தலைவருமான இவரது மறைவுக்கு இந்திய நாடு முழுவதும் துக்கம் அனுசரிக்கப்பட்டுள்ளது.

டெல்லியில் உள்ள வீட்டில் வைக்கப்பட்டுள்ள வாஜ்பாய் உடலுக்கு நாடு முழுவதிலும் இருந்து வந்து தலைவர்கள் அஞ்சலி செலுத்தி வருகின்றனர்.

இந்நிலையில் தமிழக பா.ஜ.க. தலைவர் தமிழிசை சவுந்தரராஜன், டெல்லி சென்று வாஜ்பாய் உடலுக்கு மலரஞ்சலி செலுத்தினார். பின்னர் செய்தியாளர்களிடம் பேசிய அவர், வளர்ச்சி திட்டங்களின் நாயகன் வாஜ்பாய் என புகழாரம் சூட்டினார்.

‘நாட்டை வல்லரசாக்குவதற்கு பிள்ளையர் சுழி போட்டவர் வாஜ்பாய். பன்முகத்தன்மை கொண்ட வாஜ்பாய் போன்ற தலைவரை இனிமேல் பார்க்க முடியுமா என தெரியவில்லை. அவருக்கு அஞ்சலி செலுத்தியபோதும், ஆறுதல் பெற முடியாமல் தவிக்கிறோம்’ என்றும் தமிழிசை சவுந்தரராஜன் கூறினார்.