Aug 16

மேட்டூர் அணையில் 1.70 லட்சம் கன அடி நீர் திறப்பு; காவிரியில் வெள்ளப் பெருக்கு!

மேட்டூர் அணையில் இருந்து திறக்கப்பட்ட நீரால்,காவிரியில் வெள்ளப் பெருக்கு ஏற்பட்டுள்ளது. 

கர்நாடகாவில் காவிரி நீர்பிடிப்புப் பகுதிகளில் தொடர் மழை பெய்து வருகிறது. இதனால் அங்குள்ள அணைகள் நிரம்பின. இதையடுத்து அணைகளின் பாதுகாப்பு கருதி தண்ணீர் திறந்துவிடப்பட்டுள்ளது. 


கபினி அணையில் இருந்து 55,000 கன அடி நீரும், கே.ஆர்.எஸ் அணையில் இருந்து 1.20 லட்சம் கன அடி நீரும் திறக்கப்பட்டது. இதனால் காவிரியில் 1.75 லட்சம் கன அடி நீர் வந்து கொண்டிருக்கிறது. 

தமிழகத்திற்கு வரும் நீரின் அளவு தொடர்ந்து அதிகரித்து வருவதால் மேட்டூர் அணைக்கு நீர்வரத்து 1.55 லட்சத்தில் இருந்து 1.70 லட்சம் கன அடியாக உயர்ந்துள்ளது. இதன் காரணமாக மேட்டூர் அணை தனது முழு கொள்ளளவான 120 அடி நிரம்பியே காணப்படுகிறது.

இதையடுத்து அணையில் இருந்து கிழக்கு மற்றும் மேற்கு கால்வாய் பாசனத்திற்காக 800 கன அடி நீர் வெளியேற்றப்பட்டு வருகிறது. நீர் இருப்பு 93.95 டி.எம்.சியாக உள்ளது. 

மேட்டூர் அணையில் இருந்து திறக்கப்படும் நீரின் அளவு 1.60 லட்சம் கன அடியில் இருந்து 1.70 லட்சம் கன அடியாக அதிகரிக்கப்பட்டுள்ளது.