Aug 15

கேரளா மக்களுக்கு ரூ.10 லட்சம் நிதியுதவி வழங்கிய நடிகை ஸ்ரீபிரியா

கேரளா மாநிலத்தில் வெள்ளத்தால் பாதிக்கப்பட்ட மக்களுக்கு உதவும் வகையில் நடிகை ஸ்ரீபிரியா ரூ. 10 லட்சம் நிதியுதவி வழங்கியுள்ளார். 

கேரளாவில் கடந்த ஒரு வாரங்களுக்கு மேலாக கடும் மழை பெய்து வருகிறது. இதுவரை ஏற்பட்ட நிலச்சரிவு உள்ளிட்ட இயற்கை பேரிடர்களில் சிக்கி 39 பேர் உயிரிழந்துள்ளனர். மேலும், 50 ஆயிரத்திற்கும் மேற்பட்டோர் வீடுகளை இழந்து பாதுகாப்பு முகாம்களில் தங்கவைக்கப்பட்டுள்ளனர். 

சுமார் 26 ஆண்டுகளுக்கு பிறகு முதன்முறையாக இடுக்கி அணை திறக்கப்பட்டதால், அம்மாநிலத்தில் உள்ள ஆறுகளில் வெள்ளம் கரைபுரண்டு ஓடுகிறது. நேற்றிரவு முதல் மீண்டும் மழை பெய்து வருவதால் கேரளா மக்கள் மத்தியில் அச்சம் ஏற்பட்டுள்ளது. 

பல கிராமங்கள் வெள்ளத்தில் மிதந்து வருவதால், அங்கு வசிக்கும் மக்கள் உண்ண உணவு, குடிக்க நீரின்றி தவிக்கும் நிலை ஏற்பட்டுள்ளது.

இந்நிலையில், கேரளா மக்களுக்கு உதவும் வகையில், தங்களால் முயன்ற பொருளுதவி, உணவு போன்றவற்றை கொடுத்து வருகின்றனர். மேலும், வெள்ளத்தால் பாதிக்கப்பட்ட மக்களுக்கு உதவும் வகையில், நடிகர்கள் சூர்யா மற்றும் கார்த்தி, கமல் ஹாசன் ஆகியோர் தலா ரூ.25 லட்சம் நிதியுதவி அளித்துள்ளனர்.