Aug 15

இந்தியக் குழந்தைகளைத் தத்தெடுக்க ஆஸி., அரசு அனுமதி

ஆஸ்திரேலிய அரசு 8 ஆண்டுகளுக்குப் பின் இந்தியாவிலிருந்து குழந்தைகளைத் தத்தெடுப்பதற்கு அனுமதி வழங்க உள்ளது. 

இது குறித்து அந்நாட்டு பெண்கள் மற்றும் குழந்தைகள் மேம்பாட்டு அமைச்சகம் வெளியிட்டுள்ள அறிவிப்பில், எட்டு ஆண்டுகளுக்கு முன் இந்தியாவிலிருந்து குழந்தைகளைத் தத்தெடுக்க விதிக்கப்பட்ட தடையை நீக்க உள்ளதாகக் கூறப்பட்டுள்ளது. 

இந்தியாவிலிருந்து குழந்தைகள் கடத்தப்படுவது தெரியவந்ததால் அங்கீகரிக்கப்பட்ட இந்திய நிறுவனங்கள்கூட குழந்தைகளை இந்தியாவிலிருந்து ஆஸ்திரேலியாவுக்கு தத்தெடுத்து வர அனுமதி மறுக்கப்பட்டது. 

இதனிடையே, இந்தியாவில் 2015ஆம் ஆண்டு சிறார் நீதி சட்டம் இயற்றப்பட்டது. தொடர்ந்து, 2017ஆம் ஆண்டில் தத்தெடுத்தல் விதிமுறைகள் அறிவிக்கப்பட்டன. இந்திய அரசு ஆஸ்திரேலிய அரசுடன் இரு நாடுகளிடையே தத்தெடுப்பதை மீண்டும் அனுமதிப்பது குறித்து பேசிவந்தது.

இதன் பயனாக, இந்தியாவில் தற்போதைய நடைமுறையில் முன்னேற்றம் ஏற்பட்டுள்ளதாக அந்நாட்டு பெண்கள் மற்றும் குழந்தைகள் மேம்பாட்டு அமைச்சகம் கூறியுள்ளது. விரைவில் இந்தியாவிலிருந்து தத்தெடுப்பதற்கு ஆஸ்திரேலிய அரசு அனுமதி வழங்கும் என எதிர்பார்க்கப்படுகிறது.