Aug 14

3 ஆண்டுகளில் இஸ்ரோவுக்கு ரூ.5,600 கோடி வருவாய்

இந்திய விண்வெளி ஆய்வு மையம் கடந்த 3 ஆண்டுகளில் ரூ.5,600 கோடி வருவாய் ஈட்டியுள்ளது. 

இது குறித்து மத்திய வானியல் துறை வெளியிட்டுள்ள தகவலில், இஸ்ரோ தனது வர்த்தக நிறுவனமான ஆண்ட்ரிக்ஸ் கார்பரேஷன் லிமிட்., மூலம் மார்ச் 2015 முதல் மார்ச் 2018 வரையான 3 ஆண்டுகளில் ரூ.5600 கோடி வருவாய் ஈட்டியுள்ளது என தெரிவிக்கப்பட்டுள்ளது. 

இதில் கடந்த 2017-18ஆம் ஆண்டில் ரூ.1,932 கோடி வருவாய் கிடைத்துள்ளது எனவும் இது கடந்த 2016-17ஆம் ஆண்டு கிடைத்த வருவாயான ரூ.1,872 கோடியை விட சற்று அதிகம் என்றும் கூறப்பட்டுள்ளது. 

இந்த மூன்று ஆண்டுகளில் இஸ்ரோ ரூ.7,209 கோடியை செலவிட்டுள்ளது. விண்வெளிப் பயணம், பூமியை ஆராய்தல், செயற்கைக் கோள் தொலைத்தொடர்பியல், கோள்கள் ஆராய்ச்சி போன்ற பலவற்றிற்கு இந்தத் தொகை செலவாகியுள்ளது.

இஸ்ரோ வெளிநாட்டு செயற்கைக் கோள்களை விண்ணில் செலுத்தும் சேவையின் மூலம் வருவாய் ஈட்டுகிறது. ஆனால், “பிற நாட்டு செயற்கைக் கோள்களை விண்ணில் செலுத்து மூலம் 10 முதல் 20 சதவீதம் வருவாயை மட்டுமே பெற முடிகிறது. 75% வருவாய் தொலைத் தொடர்பு செயற்கைக் கோள் சேவைகள் மூலமே கிடைக்கிறது.” என ஆண்ட்ரிக்ஸ் கார்பரேஷனின் தலைவர் எஸ்.ராகேஷ் கூறுகிறார். 

தற்போது இஸ்ரோவின் தொலைத்தொடர்பு சேவைக்கு ரிலையன்ஸ், சன் நெட்வொர்க் போன்ற 84 பெரிய வாடிக்கையாளர்கள் உள்ளனர். மாணவர்கள் மற்றும் பல்கலைக்கழகங்கள் உருவாக்கிய செயற்கைக் கோள்கள் உட்பட 99 செயற்கைக் கோள்கள் இஸ்ரோ மூலம் விண்ணுக்கு அனுப்பப்பட்டுள்ளன. இதில், 69 செயற்கைக் கோள்கள் வெளிநாட்டுகளுக்குச் சொந்தமானவை.