Jun 04

மூன்று நாடுகள் ஹாக்கி: இந்தியா – ஜெர்மனி ஆட்டம் டிரா!

மூன்று நாடுகள் ஹாக்கி தொடரில் ஜெர்மனிக்கு எதிரான ஆட்டத்தை இந்திய அணி 2-2 என டிரா செய்தது.

இந்தியா, ஜெர்மனி, பெல்ஜியம் ஆகிய மூன்று நாடுகள் பங்கேற்கும் ஹாக்கி தொடர் ஜெர்மனி நாட்டின் டஸ்ஸல்ட்ரோப் நகரில் நடைபெற்று வருகிறது. இத்தொடரில் சனிக்கிழமையன்று ஜெர்மனி – இந்தியா அணிகள் மோதிய ஆட்டத்தில் அனல் பறந்தது.

ஆட்டத்தில் 13வது நிமிடத்தில் ஜெர்மனி அணியின் நிக்லாஸ் முதல் கோல் போட்டார். அதற்கு பதிலடியாக, இந்திய வீரர் மந்நீப் சிங் 45வது நிமிடத்தில் கோல் போட்டார். அதே நிமிடத்தில் சர்தார் சிங் மற்றொரு கோல் போட்டு இந்திய அணிக்கு முன்னிலை அளித்தார்.

ஜெர்மனியின் அனுபவ வீரர் டொபியாஸ் 52வது நிமிடத்தில் மற்றொரு கோல் அடித்து அந்த அணியை தோல்வியிலிருந்து காப்பாற்றினார். இதனால், ஆட்டம் டிராவில் முடிந்தது.

இந்தியா தனது அடுத்த ஆட்டத்தில் பெல்ஜியம் அணியை திங்கட்கிழமை எதிர்கொள்ளும்.