Aug 09

வரும் 2019க்குள் இந்தியாவில் 12 சூப்பர் பைக்குகளை அறிமுகம் செய்யும் பெனெல்லி!

சீனாவின் கியான்ஜியாங் குழுமத்தின் கீழ் செயல்பட்டு வரும் இத்தாலிய மோட்டார் சைக்கிள் நிறுவனமான பெனெல்லி, அடுத்த ஆண்டு இறுதிக்குள் 12 புதிய பைக்குகளை இந்தியாவில் அறிமுகம் செய்யவுள்ளதாக தெரிவித்துள்ளது. 

இந்த புதிய மாடல் 300 சிசி மற்றும் அதற்கு அதிகமான திறன் பெற்றவையாக இருக்கும். முதல் பைக் வரும் அக்டோபர் மாதம் அறிமுகம் செய்யப்பட உள்ளது. 

இதுதொடர்பாக பேசிய பெனெல்லி நிறுவனத்தின் அமெரிக்க, ஆசிய, ஆப்பிரிக்க பகுதிகளில் விளம்பர மற்றும் தகவல்தொடர்பு பிரிவின் மூத்த இயக்குநர் டண்டி பஸ்டோஸ், தற்போது முதல் அடுத்த ஆண்டு இறுதி வரை 12 புதிய மாடல் பைக்குகளை இந்தியாவில் அறிமுகம் செய்ய உள்ளோம். 

நடப்பாண்டில் மட்டும் பெனெல்லி டி.ஆர்.கே 500 மற்றும் பெனெல்லி லியோன்சினோ 500 ஆகிய மாடல்களை அறிமுகம் செய்கிறோம். இதன் 4 வகையான பைக்குகளை இந்திய சாலைகளில் பயணிக்க விடவுள்ளோம்.அடுத்த மேலும் 2 மாடல்கள், வித்தியாசமான எஞ்சினுடன் வெளிவருகிறது. மேலும் இம்பீரியலே மாடல்களில் 400 மற்றும் 530 ஆகியவற்றை விற்பனைக்கு கொண்டு வர திட்டமிட்டுள்ளோம் என்று கூறினார். 

இந்நிறுவனம் சமீபத்தில் தெலங்கானா அரசிடனும், ஆதிஷ்வர் ஆட்டோ ரைட் இண்டர்நேஷனல் ஆகியவற்றுடன் ஒப்பந்தம் ஒன்றில் கையெழுத்திட்டுள்ளது. 

தெலங்கானாவில் அமைக்கப்படும் புதிய தொழிற்சாலையின் மூலம் ஆண்டிற்கு 7,000 பைக்குகள் தயாரிக்கப்பட்டு, விற்பனைக்கு கொண்டு வரப்படும். இது ஐதராபாத்திற்கு அருகே அமைக்கப்படவுள்ளது.