Jun 03

புரட்டி போட்ட மோரா சூறாவளி; இடமின்றி தவிக்கும் ரோஹிங்கியா அகதிகள்...!

வங்கதேசத்தை தாக்கிய மோரா சூறாவளியினால் ஆயிரக்கணக்கான ரோஹிங்கியா அகதிகள் தவிக்கும் நிலை ஏற்பட்டுள்ளது.

மியான்மரில் இருந்து அகதிகளாக வெளியேறி வங்கதேச எல்லைப் பகுதியில் 12,000க்கும் அதிகமான ரோஹிங்கியா அகதிகள் வசிக்கும் முகாம்கள் உள்ளன. இந்நிலையில் வங்கதேசத்தை கடுமையாக தாக்கிய மோரா சூறாவளியால், அந்நாட்டில் ஏழு பேர் உயிரிழந்தனர். 50 ஆயிரத்திற்கும் மேற்பட்டோர் காயமடைந்தனர்.

அதில் அகதிகள் முகாம் கடுமையாக சேதமடைந்துள்ளன. இதனால் அவர்கள் வெட்டவெளியில் வாழும் சூழலுக்குள் தள்ளப்பட்டுள்ளனர். பலுகாலி(Balukhali) மற்றும் குடுபலோங்(Kutupalong) முகாம்களில் உள்ள பத்தாயிரம் கூரை வீடுகளும் கடுமையான சேதமடைந்துள்ளன. வங்கதேசத்தில் மூன்று லட்சத்திற்கும் அதிகமான ரோஹிங்கியா அகதிகள் வாழ்ந்து வருகின்றனர்.

சூறாவளித் தாக்குதலால் முகாம்களில் உணவு, வசிப்பிடம், மருத்துவ வசதிகள், சுகாதார பிரச்னைகள்’ ஏற்பட்டுள்ளதாக நிவாரணப் பணிகளில் ஈடுபட்டுள்ள அதிகாரிகள் தெரிவித்துள்ளனர். வங்கதேசம் முழுவதும் நான்கு லட்சத்திற்கும் மேற்பட்ட மக்கள் மோரா சூறாவளி காரணமாக இடம்பெயர்ந்துள்ளனர்.