Jun 02

மாட்டிறைச்சி விவகாரம்: மத்திய அரசுக்கு புத்திமதி சொன்ன நடிகர்

இறைச்சிக்காக மாடுகளை விற்பதற்கு விதிக்கப்பட்டுள்ள தடைக்கு எதிராக நடிகர் சித்தார்த் மத்திய அரசுக்கு புத்திமதி கூறியுள்ளார்.

இறைச்சிக்காக மாடுகளை விற்பதற்கு தடைவிதித்து மத்திய அரசு அண்மையில் உத்தரவிட்டது. இந்த உத்தரவை எதிர்த்து நாடு முழுவதும் போராட்டங்கள் அதிகரித்து வருகின்றன. நாட்டின் பல்வேறு இடங்களில் இந்த அறிவிப்புக்கு எதிர்ப்பு தெரிவிக்கும் விதத்தில் 'மாட்டிறைச்சித் திருவிழாக்களும்' நடத்தப்பட்டு வருகின்றது.

இதுகுறித்து தனது ட்விட்டர் பக்கத்தில் கருத்து தெரிவித்துள்ள நடிகர் சித்தார்த், இறைச்சிக்காக மாடுகளை விற்பதற்கு விதிக்கப்பட்டுள்ள தடைக்கு எதிர்ப்பு தெரிவித்துள்ளார்.

"அன்பார்ந்த பா.ஜ.க.! உங்களிடம் அதிகாரம் இருக்கிறது. அதை நாட்டை முன்னேற்ற பயன்படுத்துங்கள். பொதுமக்களின் தனிப்பட்ட விருப்பங்களில் தலையிடாதீர்கள். இந்த இந்து தேச பிரச்சாரத்தை நிறுத்துங்கள். நாம் அதைவிட மேலானவர்கள்.”“மாட்டிறைச்சி தொடர்பான தடை உத்தரவு தேவையற்றது. அது மக்களை கிளர்ச்சியடைய வைக்கிறது. மாநில அரசுகள் ஏற்றாலும், மத்திய அரசு இதனைத் தவிர்க்க வேண்டும்.”

“நாம் இந்தியர்கள். வாழுங்கள், வாழவிடுங்கள். வெறுப்பை நிறுத்துங்கள்” என்று அடுத்தடுத்து மூன்று ட்வீட்களில் சித்தார்த் மத்திய அரசுக்கு அறிவுரை கூறியுள்ளார்.