Jul 26

உயிர்நீத்த கார்கில் வீரர்களுக்கு கண்ணீரால் வீரவணக்கம் செய்வோம்; சேவாக் அதிரடி டுவிட்!

கார்கில் வீரர்களுக்கு அஞ்சலி செலுத்தும் வகையில், முன்னாள் கிரிக்கெட் வீரர் சேவாக் டுவிட்டரில் பதிவிட்டுள்ளார். 

ஜம்மு காஷ்மீர் மாநிலத்தின் கார்கில் பகுதியில் 1999ஆம் ஆண்டு ’ஆபரேஷன் விஜய்’ என்ற பெயரில் இந்தியா - பாகிஸ்தான் போர் நடைபெற்றது. இதில் பாகிஸ்தான் ராணுவத்தினரையும், பயங்கரவாதிகளை வீழ்த்தி, வரலாற்று வெற்றியை இந்திய ராணுவம் பதிவு செய்தது. 

இதன் அதிகாரப்பூர்வ வெற்றி ஜூலை 26, 1999ல் அறிவிக்கப்பட்டது. இந்நிலையில் கார்கில் போரின் 19வது ஆண்டு நினைவு தினம் இன்று கடைபிடிக்கப்படுகிறது. இதையொட்டி வீரமரணம் அடைந்தவர்களுக்கு அஞ்சலி செலுத்தப்பட்டு வருகிறது. 

இதில் இந்திய ராணுவத்தினரும், வீரர்களின் உறவினர்களும் பங்கேற்றுள்ளனர். இந்த சூழலில் முன்னாள் கிரிக்கெட் வீரர் சேவாக் டுவிட்டரில் பதிவு ஒன்றை இட்டுள்ளார். அதில், ’நமது கதாநாயகர்களின் பெருமை வாய்ந்த செயலிற்காக சிறு துளி கண்ணீர் சிந்துவோம்.

கார்கில் மண்ணில் போரிட்டு உயிர்நீத்து, வரலாற்றில் இடம்பிடித்தவர்களுக்கு வீரவணக்கம் செலுத்துவோம். 18,000 அடிக்கும் மேலாக கரடுமுரடான நிலப்பரப்பு, செங்குத்தான மலைகளில் போரிட்டுள்ளனர். அவர்களின் தியாகத்தால் நம் இந்தியா உயர்ந்து நிற்கிறது. ஜெய்ஹிந்த்!’ என்று குறிப்பிட்டுள்ளார்.