Jul 26

தென் ஆப்பிரிக்காவில் பிரதமர் மோடி; பிரிக்ஸ் மாநாட்டில் இன்று உரை!

பிரதமர் மோடி 3 நாட்கள் சுற்றுப்பயணமாக பிரிக்ஸ் மாநாட்டில் பங்கேற்க தென் ஆப்பிரிக்கா சென்றுள்ளார். 

உகாண்டாவின் தலைநகர் கம்பாலாவில் இருந்து, நேற்று பிரிடோரியாவிற்கு மோடி வந்து சேர்ந்தார். கடந்த 1997ஆம் ஆண்டிற்கு பிறகு, கம்பாலாவிற்கு இந்தியப் பிரதமர் ஒருவரின் வருகை இதுவே என்பது குறிப்பிடத்தக்கது. நடப்பாண்டிற்கான பிரிக்ஸ் மாநாட்டின் சாராம்சம் ‘ஆப்பிரிக்காவில் பிரிக்ஸ்’ என்பதாகும். 

ஜோஹன்னெஸ்பர்க்கில் நடைபெறும் பிரிக்ஸ் மாநாடு, மோடி பங்கேற்கும் 10வது பிரிக்ஸ் மாநாடு ஆகும். இதில் சர்வதேச அமைதி, பாதுகாப்பு, அரசுகளின் செயல்பாடு, வர்த்தகம் உள்ளிட்டவை குறித்து பேச்சுவார்த்தை நடைபெறுகிறது. 

மேலும் சீன அதிபர் ஜி ஜின்பிங் உள்ளிட்ட பல்வேறு உலகத் தலைவர்களை, பிரதமர் மோடி சந்தித்து பேசுகிறார். முன்னதாக இரண்டு நாட்கள் சுற்றுப்பயணமான ருவாண்டா சென்றார்.

இதுவே இந்தியப் பிரதமர் ஒருவரின் முதல் வருகை என்பது குறிப்பிடத்தக்கது.பிரிக்ஸ்(BRICS) என்பது பிரேசில், ரஷ்யா, இந்தியா, சீனா, தென் ஆப்பிரிக்கா ஆகிய நாடுகளின் ஒருங்கிணைந்த அமைப்பாகும்.

தொடக்கத்தில் பிரிக்(BRIC) என்றிருந்த நிலையில், 2010ஆம் ஆண்டு தென் ஆப்பிரிக்கா சேர்க்கப்பட்டது. தென் ஆப்பிரிக்கா உடனான இந்தியாவின் உறவு மிக நீண்ட வரலாற்றைக் கொண்டது. 

இந்தியா - தென் ஆப்பிரிக்கா இடையில் 1993ல் தொடங்கிய நல்லுறவு, நடப்பாண்டு 25ஆம் ஆண்டை எட்டியுள்ளது. மேலும் பீட்டர்மாரிட்ஸ்பர்க் ரயில் நிலையத்தில் ரயிலில் இருந்து காந்தி வெளியேற்றப்பட்டதன் 125வது ஆண்டு தினம் ஆகும். 

தென் ஆப்பிரிக்காவில் இந்தியா வம்சாவளியைச் சேர்ந்த 1.5 மில்லியன் பேர் வசித்து வருகின்றனர். இவர்கள் அந்நாட்டு மக்கள் தொகையில் 3% என்பது குறிப்பிடத்தக்கது.