Jul 25

ராகுலுக்கு எதிரான உரிமை மீறல் நோட்டீஸை பரிசீலிக்கும் முடிவில் சபாநாயகர்

காங்கிரஸ் தலைவர் ராகுலுக்கு எதிராக பாஜக எம்.பி.-க்கள் உரிமை மீறல் நோட்டீஸ் கொடுத்துள்ளனர். இதனை பரிசீலனை செய்வதாக சபாநாயகர் சுமித்ரா மகாஜன் உறுதி தெரிவித்துள்ளார். 

நாடாளுமன்ற மழைக்கால கூட்டத்தொடர் நடைபெற்று வருகிறது. இதில், மத்தியில் ஆளும் பாரதிய ஜனதா தலையிலான அரசு மீது தெலுங்கு தேசம் கட்சி, காங்கிரஸ் உள்ளிட்ட கட்சிகள் கொண்டு வந்த நம்பிக்கையில்லா தீர்மானம் மீதான வாக்கெடுப்பு சில தினங்களுக்கு முன்னர் நடைபெற்றது. அதில், ஆளும் பாஜக பெரும்பான்மையை நிரூபித்தது. 

வாக்கெடுப்புக்கு முன்னர் நடைபெற்ற விவாதத்தின் போது பேசிய காங்கிரஸ் தலைவர் ராகுல், பாஜக அரசு மீது சரமாரியான குற்றச்சாட்டுகளை முன்வைத்ததுடன், பிரதமர் மோடியை கடுமையாக விமர்சித்து பேசினார். 

மேலும், பாதுகாப்புத்துறை அமைச்சர் நிர்மலா சீதாராமன் நாட்டுக்கு பொய்யான தகவலை கூறுகிறார் என குற்றம் சாட்டிய ராகுல், ரஃபேல் ஒப்பந்தத்தில் பிரான்ஸ் நாட்டுடன் ரகசிய ஒப்பந்தம் என நிர்மலா சீதாராமன் கூறுகிறார்.ஆனால், நான் பிரான்ஸ் பிரதமரை தனிப்பட்ட முறையில் சந்தித்து இதுகுறித்து கேட்ட போது, அது போன்று ரகசிய ஒப்பந்தம் எதுவும் இல்லை என அவர் விளக்கமளித்ததாகவும் தெரிவித்தார். 

ராகுல் மேற்கண்டவாறு பேசிய போது பாஜக-வினர் கடும் அமளியில் ஈடுபட்டனர். ஆஅனால், அதனை பொருட்படுத்தாமல் கடும் ஆவேசமாக பேசிய ராகுல், தனது உரையை முடித்தவுடன் மோடியின் இருக்கைக்கு சென்று அவரை கட்டியணைத்தார். கட்டி தழுவிய ராகுலுக்கு கைகுலுக்கி மோடி வாழ்த்து தெரிவித்தார். 

அதன்பின்னர் தனது இருக்கைக்கு வந்து அமர்ந்த ராகுலை, காங்கிரஸ் எம்.பி.,-க்கள் பாராட்டினர். அதற்கு அவர்களைப் பார்த்து கண் அடித்து ராகுல் சிரித்தார். 

இந்நிலையில், பிரதமர் மோடி மற்றும் பாதுகாப்புத்துறை அமைச்சர் நிர்மலா ஆகியோருக்கு எதிராக, ஆதாரம் இல்லாமல் குற்றம் சாட்டியதாக, காங்கிரஸ் தலைவர் ராகுலுக்கு எதிராக பாஜக எம்.பி.-க்கள் உரிமை மீறல் நோட்டீஸ் கொடுத்துள்ளனர். 

நிஷிகாந்த் துபே, அனுராக் தாக்கூர், துஷ்யந்த் சிங், பிரகலாத் ஜோஷி ஆகியோர் அளித்துள்ள இந்த நோட்டீசை பரிசீலனை செய்வதாக சபாநாயகர் சுமித்ரா மகாஜன் உறுதி அளித்துள்ளார். 

அதேசமயம், பிரதமர் மோடியை ராகுல் கட்டியணைத்த சம்பவம் பல்வேறு தரப்பினரின் பாராட்டுகளை பெற்றாலும், ராகுல் கண்ணடித்த சம்பவத்தை பாஜக-வினர் உள்பட பலரும் விமர்சித்து வருகின்றனர் என்பது குறிப்பிடத்தக்கது.