Jul 23

ஈரான் இதுவரை கண்டிராத வரலாற்று பேரழிவை சந்திக்க நேரிடும்: அதிபர் டிரம்ப்!

அமெரிக்காவை அச்சுறுத்த நினைத்தால், வரலாறு இதுவரை கண்டிராத பேரழிவை ஈரான் சந்திக்க நேரிடும் என்று அதிபர் டொனால்டு டிரம்ப் எச்சரிக்கை விடுத்துள்ளார். 

ஈரானுடனான அணு சக்தி ஒப்பந்தத்தை முறித்துக் கொண்ட அமெரிக்கா, அந்நாட்டின் மீது பல்வேறு பொருளாதார தடைகளை விதித்து வருகிறது. அந்தவகையில் தனது நட்பு நாடுகளும் ஈரானை புறக்கணிக்க வேண்டும் என அமெரிக்கா நேரடி பிரசாரத்தில் ஈடுபட்டு வருகிறது. அந்தவகையில் இந்தியா உள்ளிட்ட அமெரிக்க நட்பு நாடுகள் ஈரானிடம் கச்சா எண்ணெய் வாங்கக் கூடாது என்று அமெரிக்கா நிர்பந்தம் விதித்தது. 

ஈரான் அதிபர் ஹஸன் ரவுகானியும், இதற்கு பதிலடி தரும் விதமாக ‘ஈரானிடம் இருந்து கச்சா எண்ணை கொள்முதல் செய்யாவிட்டால் மேற்கத்திய நாடுகளுக்கு மத்திய கிழக்காசிய துணைகண்டத்தில் உள்ள இதர 15 நாடுகள் பெட்ரோல் ஏற்றுமதி செய்வதை ஈரான் தடுத்து நிறுத்தும் என்று எச்சரிக்கை விடுத்திருந்தார்.

இதனிடையே பல்வேறு நாடுகளில் பணியாற்றும் ஈரான் நாட்டு தூதர்கள் மத்தியில் நேற்று உரையாற்றிய அதிபர் ஹஸன் ரவுஹானி கூறுகையில் ‘‘ஈரானுடன் போரிட அமெரிக்கா நினைத்தால், அது அனைத்து போர்களுக்கும் தாய்ப்போராக இருக்கும் என்று எச்சரித்துள்ளார். மேலும் சிங்கத்தின் வாலை பிடித்து விளையாடாதீர்கள். இதன் விளைவு வருத்தத்தில்தான் போய் முடியும்’’ என்றும் அவர் குறிப்பிட்டார். 

இந்த நிலையில் இதற்கு பதிலடியாக ட்விட்டரில் பதிவிட்டுள்ள அதிபர் டிரம்ப், அமெரிக்காவை அச்சுறுத்த நினைத்தால், வரலாறு இதுவரை கண்டிராத பேரழிவை ஈரான் சந்திக்க நேரிடும் என்று மிரட்டல் விடுத்துள்ளார். ஈரானின் மிரட்டல்களைக் கேட்டுக்கொண்டு நீண்டகாலமாக அமெரிக்கா அமைதியாக இருக்காது என்றும் அதிபர் டிரம்ப் கூறியுள்ளார்.