Jul 21

ரூ.62,000 விலை குறைப்பில் நியூ கவாசாகி நிஞ்ஜா 300 ஏபிஎஸ் அறிமுகம்!

புதிய நிஞ்ஜா 300 மாடலை ரூ.2.98 லட்சத்தில் இந்திய கவாசாகி மோட்டார்ஸ் நிறுவனம் நேற்று அறிமுகம் செய்தது. 

இந்த புதிய மாடல் முன்புற மற்றும் பின்புற ஆண்டி-லாக் பிரேக்கிங் சிஸ்டம்(ABS) வசதியுடன், முந்தைய மாடலை விட ரூ.62,000 விலை குறைப்புடன் வெளிவந்துள்ளது. இந்த விலை குறைப்பிற்கு காரணம், இதன் பெரும்பாலான உட்புற பாகங்கள் உள்நாட்டில் தயாரிக்கப்பட்டதே ஆகும். 

2018 கவாசாகி நிஞ்ஜா 300 ஏபிஎஸ் மாடல் லைம் கிரீன்/எபோனி மற்றும் கேண்டி பிளாஸ்மா ப்ளூ ஆகிய வண்ணங்களில் கிடைக்கிறது. இதுதொடர்பாக பேசிய இந்திய கவாசாகி மோட்டார்ஸின் நிர்வாக இயக்குநர் யுடகா யமஷிடா, எங்களுடைய விரிவாக்கத் திட்டத்தில் நிஞ்ஜா 300 ஏபிஎஸ், உள்ளூர் தயாரிப்பாக அமைந்துள்ளது. 

இது ‘மேக் இன் இந்தியா’ திட்டத்திற்கு முன்னுதாரணமாக இருக்கும். உள்ளூர் தயாரிப்பு மூலம் சந்தையில் வாடிக்கையாளர்களுக்கு போட்டி நிறைந்த விலையை நிர்ணயிக்க முடியும். எங்களது தயாரிப்பை புதிய வாடிக்கையாளர்களும் பயன்படுத்த ஏதுவாக இருக்கும் என்றார்.

இந்த மோட்டார் சைக்கிளில் எந்தவொரு இயந்திர மாற்றமும் செய்யப்படவில்லை. கவாசாகி நிஞ்ஜா 300ல் 39 PS ஆற்றல் மற்றும் 27 Nm டர்க்யூ திறன், 296 சிசி, 8 வால்வ், இரட்டை இணை சிலிண்டர் எஞ்சின், லிக்யூடு கூல்டு மோட்டார், 6 ஸ்பீட் கியர்பாக்ஸ் உள்ளிட்டவை இடம்பெற்றுள்ளன. 

இதன் முகப்பு பகுதி மிக அழகிய வடிவமைப்பில், இரட்டை முகப்பு விளக்குடன் காணப்படுகிறது. ஒட்டுமொத்தமாக நிஞ்ஜா ZX-10R மாடலில் இருந்து தழுவியே புதிய மாடல் உருவாக்கப்பட்டுள்ளது. 

இந்தியாவில் நிஞ்ஜா 300 எபிஎஸ் ஆனது, யமஹா YZF-R3 ABS(ரூ.3.48 லட்சம்), கேடிஎம் RC 390 மற்றும் பெனெல்லி 302R மாடல்களுக்கு போட்டியாக அமைந்துள்ளது. இந்த மாடல் பைக்கை முன்பதிவு செய்பவர்களுக்கு, 3 ஆண்டுகள் வரம்பற்ற மைலேஜ் வாரண்டி அளிக்கப்படுகிறது.