Jul 21

யாழில் ஏற்பட்ட பிரச்சினை !

வாள்கள் கம்பிகளுடன் மூன்று மோட்டார் சைக்கிலில் வந்த வாள்வெட்டுக் குழுவொன்று வீட்டிற்குள் நுழைந்து வீட்டிலிருந்தவர்களை அச்சுறுத்திவிட்டு வீட்டின் கதவு ஐன்னல் கண்ணாடிகளை அடித்து நொருக்கி பெற்றோல்க் குண்டை வீசி வீட்டைக் கொழுத்தி விட்டு தப்பிச் சென்றுள்ளனர்.


சினிமா பாணி போன்று நடைபெற்ற இச் சம்பவமானது தாமரை வீதி வண்ணார் பண்ணையில் நேற்று இரவு 8.30 மணியளவில் இடம்பெற்றுள்ளது. இச் சம்பவம் தொடர்பில் மேலும் தெரிய வருவதாவது..

மேற்படி முகவரியிலுள்ள வீடொன்றுக்குள் மூன்று மோட்டார் சைக்கிலில் சுமார் 6 முதல் எட்டு பேர்வரையான வாள்வெட்டுக் குழுவினர் சென்றுள்ளனர்.

இதன் போது வீட்டில் பெற்றோரும் பிள்ளைகளும் தொலைக்காட்சி பார்த்துக் கொண்டிருந்தனர்.

ஆயினும் தமது வீட்டின் கதவை உடைத்துக் கொண்டு வீட்டிற்குள் ஒரு குழுவினர் ஆயுதங்களுடன் வீட்டை அடித்து நொருக்கியவாறு வருவதை அவதானித்து அவர்கள் கூக்குரலிட்டுக் கத்தியுள்ளனர்.

அவ்வாறு வீட்டுக்காரர்கள் கத்திய போதிலும் வீட்டிற்குள் நுழைந்த வாள்வெட்டுக் குழுவினர் தம்மிடமிருந்த வாள்கள் இரும்பும் கம்பிகள் கோடாரிகளால் வீட்டின் கதவு ஐன்னல் தொலைக்காட்சி பெட்டிகள் உள்ளிட்ட அங்கிருந்த ஏனைய பொருட்கள் பலவற்றையும் அடித்து நொருக்கியுள்ளனர்.

இதன் போது வீட்டிலிருந்த பெண்மணி பொருட்கள் எதனையும் உடைக்க வேண்டாமென கெஞ்சிக் கேட்டிருந்த போதிலும் அங்கிருந்த அனைத்துப் பொருட்களையும் தொடர்ச்சியாக அடித்து நொருக்கியுள்ளனர்.

இவ்வாறு அனைத்தையும் அடித்து நொருக்கிவிட்டு வீட்டிற்குள் பெற்றோல் குண்டையும் வீசியுள்ளனர். இதனையடுத்து வீடு பற்றியெரிய அயலவர்கள் ஓடி வர வாள்வெட்டுக் குழுவினர் தப்பிச் சென்றுள்ளனர்.

இதே வேளை தென்னிந்திய சினிமா படங்கள் போன்று மோட்டார் சைக்கிலில் ஆயுதங்களுடன் வந்த குழுவினர் சுமார் இரண்டு மூன்று நிமிடங்களுக்குள் அனைத்து அட்டகாசங்களையும் புரிந்துவிட்டுச் சென்றுள்ளனர்.

இதன் பின்னர் வாள்வெட்டுக் குழுவின் இத்தகய அட்டகாச சம்பவம் தொடர்பாக யாழ் பொலிஸாருக்கு தகவல் கொடுக்கப்பட்டதையடுத்து சம்பவ இடத்திற்கு வந்த பொலிஸார் விசாரணைகளை மேற்கொண்டு வருகின்றனர்.

இதே போன்ற சம்பவம் நேற்று அதிகாலை நல்லூர் சிவன் வீதியிலும் நடைபெற்றுள்ளது இனந்தெரியாத நபர்களால் கழிவு ஒயில் வீசப்பட்டடு வீட்டின் முன் வைக்கப்பட்ட சிலையும் உடைக்கப்பட்டது. மேலும் இதன் தொடர்ச்சியாக அச்சுவேலி பகுதியிலும் வீட்டிற்குள் புகுந்த இனந் தெரியாதவர்க்ள இதேபோன்ற பாணியிலே அட்டகாசம் நடத்தி தப்பிச் சென்றுள்ளனர்.

யாழ்ப்பாணத்தின் பல பகுதிகளிலும் தற்போது பொலிஸார் அதிகளவாக குவிக்கப்பட்டுள்ள போதும் இவ்வாறான குற்றச்செயல்கள் தொடர்ச்சியாக நடந்தேறி வருகின்றமையானது மக்கள் மத்தியில் அதிருப்தி ஏற்படுத்தியுள்ளது. பொலிஸாரின் விடுமுறை கூட இரத்து செய்த தொடர் வீதி ரோந்து நடவடிக்கைளை மேற் கொண்டிருக்கும் இந்த சமயத்திலும் பொலிஸாரின் காவலையும் மீறி இப்படியான அட்டகாசம் தொடர் கதையாகவே நடைபெற்றுக் கொண்டிருப்பதும் குறிப்பிடத்தக்கது.