May 31

12 வயதில் உலக அழகிப் போட்டியில் கலந்து கொள்ளும் இந்திய சிறுமி..!

’லிட்டில் மிஸ் யுனிவர்ஸ்’ போட்டியில் இந்தியா சார்பில் கலந்து கொள்ள ஒடிசாவைச் சேர்ந்த 12 வயது சிறுமி தேர்ந்தெடுக்கப்பட்டுள்ளார்.

மிஸ் வேர்ல்ட், மிஸ் யுனிவர்ஸ் அழகிப் போட்டிகளைப் போல சிறுமிகளுக்கென உலகளவில் “லிட்டில் மிஸ் யுனிவர்ஸ்” போட்டி ஆண்டுதோறும் நடைபெற்று வருகிறது. இந்த ஆண்டிற்கான “லிட்டில் மிஸ் யுனிவர்ஸ்” போட்டி அமெரிக்காவில் உள்ள ஜார்ஜியா மாகாணத்தில் நடைபெற உள்ளன.இந்த போட்டியில் இந்தியா சார்பில் கலந்து கொள்ள, ஒடிசாவைச் சேர்ந்த பத்மாலயா நந்தா என்ற 12 வயது சிறுமி தேர்ந்தெடுக்கப்பட்டுள்ளார். இந்த போட்டியில் கலந்து கொள்ள உள்ள முதல் ஒடிசா சிறுமியும் இவர்தான்.

தற்போது கட்டாக்கில் உள்ள ஸ்டூவர்ட் பள்ளியில் 8-ஆம் வகுப்பு படித்து வரும் பத்மாலயா, சமீபத்தில் கோழிக்கோட்டில் நடைபெற்ற மிஸ் லிட்டில் ஜுனியர் போட்டியில் மகுடம் சூடினார். அதனைத் தொடர்ந்து அவருக்கு லிட்டில் மிஸ் யுனிவர்ஸ் போட்டியில் கலந்து கொள்ளும் வாய்ப்பு கிடைத்துள்ளது.

பத்மாலயாவின் தந்தை பிரபல சுப்ரீம் கோர்ட் வக்கீல் பிரசன்ன குமார் நந்தா ஆவார். இவரின் தாய் ஒரு மருத்துவர். தனக்கு பேஷன் டிசைனிங் மற்றும் மாடலிங்கில் ஆர்வம் இருந்தாலும், தொடர்ந்து படிப்பில் கவனம் செலுத்தி வருவதாக பத்மாலயா தெரிவித்துள்ளார்.