May 31

’காலா’ ரஜினி மட்டுமல்ல.. அவர் உட்கார்ந்தால் பழைய ஜீப் கூட சூப்பர் ஸ்டார்தான்..!

’காலா’ பர்ஸ்ட் லுக் போஸ்டரில் ரஜினிகாந்த் உட்கார்ந்திருக்கக் கூடிய ஜீப்பை, மகேந்திரா நிறுவன தலைவர் விலைக்கு வாங்க விருப்பம் தெரிவித்துள்ளார்.

சில நாட்களுக்கு முன்னர் வெளியான சூப்பர் ஸ்டார் ரஜினிகாந்தின் ‘காலா’ திரைப்பட பர்ஸ்ட் லுக், இந்திய சினிமா உலகையே திரும்பி பார்க்க வைத்தது. காவி வேஷ்டியுடன் மகராஷ்டிரா பதிவெண் கொண்ட , மகேந்திரா நிறுவனத்தின் பழைய ‘தார்’ மாடல் ஜீப்பில் ரஜினி உட்கார்ந்திருக்கும் காட்சி, பலரையும் மெய் சிலிர்க்க வைத்தது.

இந்த பர்ஸ்ட் லுக் போஸ்டர் மூலம் இந்தியா முழுவதும் ரஜினி மட்டும் பிரபலம் ஆகாமல், அவர் உட்கார்ந்திருந்த ‘தார்’ மாடல் ஜீப்பும் பிரபலமாகியுள்ளது. காலா பர்ஸ்ட் லுக் போஸ்டரை பார்த்த பிரபல கார் தயாரிப்பு நிறுவனமான “மகேந்திரா மோட்டார்ஸ்” தலைவர் ஆனந்த மகேந்திரா, காலா பர்ஸ்ட் லுக்கில் பயன்படுத்தப்பட்ட ஜீப்பை விலைக்கு வாங்க விருப்பம் தெரிவித்துள்ளார்.

”ரஜினி போன்ற ஒரு சிறந்த நடிகர், தார் ஜீப்பை தன்னுடைய சிம்மாசனமாக பயன்படுத்தும் போது, அந்த காரும் பெரிய அந்தஸ்தை பெறுகிறது.” என ஆனந்த மகேந்திரா டிவீட் செய்துள்ளார். தனது அடுத்த டிவீட்டில்,” காலா சூட்டிங்கில் பயன்படுத்தப்பட்ட இந்த தார் ஜீப் குறித்த தகவல்கள் கிடைத்தால் கூறவும். இதனை வாங்கி, எங்களது கார் அருங்காட்சியகத்தில் பயன்படுத்த ஆசைப்படுகிறேன்.” எனவும் அவர் தெரிவித்துள்ளார்.இதற்கு உடனடியாக பதிலளித்துள்ள நடிகர் தனுஷின் தயாரிப்பு நிறுவனமான வுண்டர்பார்,” சார்..உங்களை எப்படி தொடர்பு கொள்வது என்ற விபரத்தை அளித்தால், தார் ஜீப் குறித்த தகவல்களை அளிக்க தயாராக உள்ளோம்.” என டிவிட்டரில் தெரிவித்துள்ளது.