May 30

ரஜினிகாந்தின் 'காலா' படத்துக்கு எதிராக புகார்

சூப்பர்ஸ்டார் ரஜினிகாந்த் நடிப்பில் உருவாகி வரும் 'காலா' திரைப்படத்துக்கு எதிராக சென்னை காவல் ஆணையர் அலுவலகத்தில் புகார் மனு அளிக்கப்பட்டுள்ளது.

ராஜசேகர் என்பவர், 'காலா' என்ற தலைப்பும் இப்படத்தின் கதைக் கருவும் தன்னுடையது என சென்னை காவல் ஆணையரிடம் புகார் மனுவை வழங்கியுள்ளார். கடந்த 1996ஆம் ஆண்டு, தென்னிந்திய திரைப்பட வர்த்தக சபையில் 'காலா' என்ற தலைப்பை பதிவு செய்திருப்பதாகவும் ராஜசேகர் தனது புகார் மனுவில் குறிப்பிட்டுள்ளார்.'

கபாலி' வெற்றியைத் தொடர்ந்து பா.ரஞ்சித் இயக்கத்தில் ரஜினிகாந்த் நடிக்கும் 164 வது படத்தின் 'தலைப்பு காலா' என அறிவிக்கப்பட்டு, முதல் பார்வை போஸ்டர் வெளியானது. இதற்கு சமூக வலைத்தளங்களில் மிகப்பெரிய வரவேற்பு கிடைத்ததையடுத்து, திரைப்படத்தின் முதற்கட்ட படப்பிடிப்பு மும்பையில் துவங்கியது. மும்பையில் நடைபெற்று வரும் படப்பிடிப்பு தளத்தில் இருந்து அவ்வப்போது ருசீகர புகைப்படங்கள் வெளியாகி 'காலா' படத்தின் மீதான எதிர்ப்பார்ப்பை அதிகரிக்கச் செய்து வருகிறது.

இந்நிலையில், ராஜசேகர் அளித்துள்ள புகார் மனுவால் 'காலா' படத்துக்கு புதிய சிக்கல் உருவாகியுள்ளதாக கூறப்படுகிறது. ராஜசேகர் தனுஷின் தந்தை கஸ்தூரி ராஜாவிடம் உதவி இயக்குனராக பணியாற்றிவர் ஆவார். ஏற்கனவே கடந்த 2012ஆம் ஆண்டு, 'கரிகாலன்' என்ற தலைப்பில் சியான் விக்ரம் நடிக்கப்போவதாக அறிவிக்கப்பட்டபோது, ராஜசேகர் அந்த தலைப்பிற்கு தடை கோரி சென்னை உயர்நீதிமன்றத்தில் இருந்து தடை உத்தரவை பெற்றுள்ளது குறிப்பிடத்தக்கது.

இப்படத்தில், ரஜினியுடன், ஹுமா குரேஷி, ஈஸ்வரிராவ், நானா படேகர், அஞ்சலி பாட்டீல், சமுத்திரக்கனி, சம்பத், ரவி கேளா, சாயாஜி ஷிண்டே உள்ளிட்ட பலர் நடித்து வருகிறார்கள். தனுஷின் வுண்டர்பார் ஃபிலிம்ஸ் நிறுவனம் தயாரித்து வரும் இப்படத்துக்கு சந்தோஷ் நாராயணன் இசையமைத்து வருகிறார்.