Jun 21

நாக்-அவுட் சுற்றில் உருகுவே: வெளியேறியது சவுதி

கால்பந்துப் போட்டியில் சவுதி அரேபியா - உருகுவே அணிகளுக்கு இடையேயான போட்டியில் உருகுவே அணி 1-0 என்ற கோல் கணக்கில் சுவுதி அரேபியா அணியை வீழ்த்தியது. 

பீபா உலகக் கோப்பை கால்பந்துத் தொடர் ஜூன் 14ஆம் தேதி தொடங்கி ஜூலை 15ஆம் தேதி வரை நடைபெறுகிறது. இதில் செவ்வாய்க்கிழமை நடைபெற்ற 3வது போட்டியில் சவுதி அரேபியா - உருகுவே அணிகள் மோதின. 

இதில், உருகுவே அணி 1-0 என்ற கோல் கணக்கில் வெற்றி பெற்றது. ஆட்டத்தின் 23வது நிமிடத்தில் தனது 100வது போட்டியில் விளையாடும் உருகுவே வீரர் லூயிஸ் ஒரு கோல் போட்டு அந்த அணிக்கு முன்னிலை பெற்றுத் தந்தார். 

இதற்கு பதில் கோல் அடிக்க முயன்ற சவுதி அரேபியாவுக்கு கடைசி வரை அது சாத்தியமாகவில்லை. இதனால், ஆட்ட நேர முடிவில் 1-0 என்ற கோல் கணக்கில் உருகுவே அணி வெற்றி பெற்றது.இதன் மூலம் தொடர்ந்து 3 உலகக் கோப்பை தொடர்களில் நாக்-அவுட் சுற்றுக்குத் தகுதிபெற்ற சாதனையை நிகழ்த்தியுள்ளது.

குருப் ஏ-வில் உருகுவே மற்றும் ரஷ்யா ஆகிய இரு அணிகளும் அடுத்த சுற்றுக்குத் தகுதி பெற்றுவிட்ட நிலையில், ஜூன் 25ஆம் தேதி இந்த அணிகள் கடைசி லீக் போட்டியில் விளையாட உள்ளன. இதே குரூப்பில் இரு போட்டிகளில் அடுத்தடுத்து தோற்ற சவுதியும் எகிப்தும் வெளியேறுகின்றன.